អ្នកវិភាគលើកឡើងថា គណបក្សមួយចំនួនដែលព្រមទទួលយកអាសនៈរបស់បក្សប្រឆាំង ក្រោយតុលាការកំពូលរំលាយនោះ ថាហាក់បានចូលរួមជំរុញប្រជាធិបតេយ្យឲ្យដើរថយក្រោយ បើទោះបីពួកគេថាការបែងចែកនោះ ធ្វើឡើងតាមច្បាប់ទើបធ្វើវិសោធនកម្មក៏ដោយ។
តុលាការកំពូលបានប្រកាសរំលាយគណបក្សសង្គ្រោះជាតិ កាលពីថ្ងៃទី១៦ខែវិច្ឆិកា ដោយចោទថាមានពាក់ព័ន្ធទទួលលុយបរទេសរៀបចំធ្វើបដិវត្តពណ៌ផ្តួលរំលំរដ្ឋាភិបាល។
១សប្តាហ៍ក្រោយមក គ.ជ.ប អះអាងថា អាសនៈសភាទាំង៥៥ របស់បក្សប្រឆាំងនេះ ត្រូវបែងចែកឲ្យទៅគណបក្សចំនួន៥ ដែលគណបក្សទាំងនេះមិនមានអាសនៈនៅក្នុងសភាទេ ហើយគណបក្សខ្លះទៀតមិនមានទាំងអាសនៈនៅឃុំសង្កាត់ផង។
ប៉ុន្តែការបែងចែកអាសនៈនេះ គណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ ប្រកាសមិនទទួលយក ហើយគណបក្សដែលទទួលយកមាន គណបក្ស ហ្វ៊ុន ស៊ិនប៉ិច គណបក្សសញ្ជាតិកម្ពុជា និង គណបក្សខ្មែរអភិវឌ្ឍន៍សេដ្ឋកិច្ច។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង លើកឡើងថា ក្នុងប្រទេសប្រជាធិបតេយ្យ គេត្រូវការគណបក្សនៅក្រៅរដ្ឋាភិបាល ឬហៅថាបក្សប្រឆាំង មានតុល្យភាពអំណាច ឬមានអ្នកគាំទ្រប្រហាក់ប្រហែលបក្សកាន់អំណាចដែរ ទើបអាចជំរុញប្រសិទ្ធភាពនៃការអភិវឌ្ឍ អភិបាលកិច្ច តាមយន្តការប្រជាធិបតេយ្យបាន។
លោក យង់ គិមអេង ថាគណបក្ស៣ដែលត្រូវបែងចែកអាសនៈឲ្យនេះ គ្មានសំឡេងគាំទ្រសូម្បីតែ១អាសនៈនៅឃុំសង្កាត់ លោកថាដូចនេះពួកគេនឹងមិនអាចជំរុញយន្តការប្រជាធិបតេយ្យបានទេ។
លោកថា៖ «យើងយល់ថា ពួកគាត់ហ្នឹង អត់ហ៊ានធ្វើអីដើម្បីរកតម្លាភាពទេ គឺថាធ្វើយ៉ាងម៉េចសម្របសម្រួលឲ្យខ្លួនមានតួនាទី មានបុណ្យសក្តិប៉ុណ្ណឹងទេបាទ។ អញ្ចឹងទេកន្លងនេះហើយ ដែលអាចធ្វើឲ្យបាត់បង់ផលប្រយោជន៍ដល់ប្រជាពលរដ្ឋ»។
អ្នកវិភាគនយោបាយ លោកបណ្ឌិត មាស នី លើកឡើងថា ការបែងចែកអាសនៈពិតជាធ្វើតាមច្បាប់មួយចំនួន ដែលតំណាងរាស្ត្របក្សកាន់អំណាចទើបធ្វើវិសោធនកម្មយ៉ាងប្រញាប់ប្រញាល់ និងក្រោមសំឡេងរិះគន់។ ប៉ុន្តែលោកថា គេត្រូវការពេលយូជាងនេះ ទើបអាចនិយាយបានថា តើការដើរចូលទៅអង្គុយក្នុងសភារបស់គណបក្សទាំង៣នេះ ដើម្បីតែអំណាច ឬដើម្បីជំរុញយន្តការប្រជាធិបតេយ្យនៅម្ពុជា។
អ្នកវិភាគរូបនេះ និយាយថា ជំហានដំបូង គណបក្សដែលប្រកាសទទួលបានអាសនៈ តាមរយៈច្បាប់បែងចែកនេះ លោកថាចង់មិនចង់ នឹងរងការរិះគន់យ៉ាងចាស់ដៃពីអ្នកតាមដានបញ្ហាសង្គម។
លោកថា៖ «តាមអ្វីដែលខ្ញុំសង្កេតមើលគណបក្សដែលបានសម្រេចទទួលយកនេះមិនមែនត្រឹមតែត្រូវមាត់ ឬត្រូវរងការរិះគន់របស់ពលរដ្ឋខ្មែរអំឡុងពេលនេះទេ វាអាចប៉ះពាល់ទៅលើប្រជាប្រិយភាពរបស់ខ្លួនទាំងផ្លូវឯកជន ទាំងផ្លូវគណបក្សផងដែរ អានេះជាការមើលឃើញរបស់ខ្ញុំនៅពេលខាងមុខ»។
សាស្ត្រាចារ្យវិទ្យាសាស្ត្រនយោបាយ លោក សូ ចន្ថា លើកឡើងថា គណបក្សទាំង៣នោះ ធ្លាប់បានចូលរួមប្រកួតប្រជែងការបោះឆ្នោតកន្លងទៅ ប៉ុន្តែលោកថា ពួកគេមិនទទួលបានការគំាទ្រពីពលរដ្ឋឡើយ ករណីនេះលោកវិភាគថា អាចមកពីពួកគេអសមត្ថភាព ឬកម្មវិធីនយោបាយ មិនអាចទាក់ទាញម្ចាស់ឆ្នោតដល់ការអភិវឌ្ឍជាតិ។
លោក សូ ចន្ថា វិភាគថា ចំណុចសូន្យ ទាំងនៅថ្នាក់ជាតិ និងថ្នាក់ក្រោមជាតិ របស់គណបក្ស ដែលបានកៅអីនៅរដ្ឋសភា តាមរយៈច្បាប់បែងចែកនេះ លោកវិភាគថា ទំនងធ្វើតាមការរៀបចំរបស់ក្រុមណាមួយ មិនមែនធ្វើឡើងដើម្បីជំរុញប្រជាធិបតេយ្យទេ។
លោកថា៖ «មិនបានចូលរួមជំរុញលទ្ធិប្រជាធិបតេយ្យទេ ក៏ប៉ុន្តែវាហាក់បានចូលរួមធ្វើឲ្យលទ្ធិប្រជាធិបតេយ្យនៅកម្ពុជានេះ មានលក្ខណដើរថយក្រោយទៅវិញ ដើរថយក្រោយ ដោយថានៅក្នុងសង្គមប្រជាធិបតេយ្យដូចជាមិនដែលឃើញមានទេ»។
យ៉ាងណាក៏ដោយលោកនាយករដ្ឋមន្ត្រីធ្លាប់អះអាងថា បើទោះបីជាគណបក្សសង្គ្រោះជាតិ ត្រូវបានតុលាការកំពូលប្រកាសឲ្យរំលាយក៏ដោយ ប៉ុន្តែលោកថា រដ្ឋាភិបាលនៅតែប្តេជ្ញាចិត្ត ដើរលើគន្លងប្រជាធិបតេយ្យសេរីពហុបក្សដដែល។
បើតាមអ្នកវិភាគ អំណាចរបស់ថ្នាក់ដឹកនាំ ទាំងនៅឃុំ សង្កាត់ និងនៅរដ្ឋសភា ពលរដ្ឋជាអ្នកបោះឆ្នោតឲ្យ មិនមែន អ្នកនយោបាយជាអ្នកបែងចែកនោះទេ។
រដ្ឋធម្មនុញ្ញជំពូក៤ មាត្រា៥១ថ្មី ចែងថា «ព្រះរាជាណាចក្រកម្ពុជា អនុវត្តគោលនយោបាយសេរីពហុបក្ស។ ប្រជាពលរដ្ឋខ្មែរជាម្ចាស់វាសនានៃប្រទេសជាតិ របស់ខ្លួន។ អំណាចទាំងអស់ជា របស់ប្រជាពលរដ្ឋ។ ប្រជាពលរដ្ឋប្រើប្រាស់អំណាច របស់ខ្លួន តាមរយៈរដ្ឋសភា ព្រឹទ្ធសភា រាជរដ្ឋាភិបាល និងសាលាជម្រះក្តី»៕