គណបក្សនយោបាយដែលប្រកាសទទួលយកអាសនៈរបស់គណបក្សសង្គ្រោះជាតិបានប្ដេជ្ញាថា ពួកគេនឹងខិតខំបម្រើប្រជាពលរដ្ឋ ដើម្បីកសាងប្រទេសជាតិឲ្យមានស្ថិរភាពនិងសន្តិភាព។
កាលពីថ្ងៃទី២២ ខែវិច្ឆិកា ឆ្នាំ២០១៧ គណៈកម្មាធិការជាតិរៀបចំការបោះឆ្នោត បានប្រជុំសម្រេចបែងចែកអាសនៈរបស់គណបក្សប្រឆំាងចំនួន៥៥ ទៅឲ្យគណបក្សចំនួន៥ ដែលក្នុងនោះមាន គណបក្ស ហ៊្វុន ស៊ិនប៉ិច បាន៤១ គណបក្សសម័ន្ធដើម្បីប្រជាធិបតេយ្យបាន៦ គណបក្សខ្មែរឈប់ក្របាន៥ គណបក្សសញ្ជាតិកម្ពុជាបាន២ និងខ្មែរអភិវឌ្ឍន៍សេដ្ឋកិច្ចទទួលបាន១អាសនៈ។
ប៉ុន្តែគណបក្សចំនួនពីរ គឺគណបក្សសម្ព័ន្ធដើម្បីប្រជាធិបតេយ្យ និងគណបក្សខ្មែរឈប់ក្រ ប្រកាសមិនទទួលយកអាសនៈនេះទេ។
ប្រធានគណបក្សសញ្ជាតិកម្ពុជា លោក សេង សុខេង មានប្រសាសន៍ថា គណបក្សរបស់លោកនឹងទទួលយកអាសនៈ២ តាមរូបមន្តបែងចែករបស់គណៈកម្មាធិការជាតិរៀបចំការបោះឆ្នោត។ លោកបន្តថា បន្ទាប់ពីទទួលបានអាសនៈហើយ គណបក្សលោកនឹងខិតខំបម្រើប្រជាពលរដ្ឋ ដើម្បីចូលធ្វើការអភិឌ្ឍប្រទេសជាតិឲ្យរីកចម្រើន។
លោកថា «បន្ទាប់ពីទទួលបានអាសនៈនេះ គណបក្សសញ្ជាតិកម្ពុជា នឹងប្ដេជ្ញាបម្រើប្រជាពលរដ្ឋគ្រប់និន្នាការទាំងអស់ មិនប្រកាន់ថាបក្សណាៗទេ ក្នុងគោលបំណងតែមួយគត់ គឺចង់ឲ្យប្រទេសយើង ក្លាយទៅជាអច្ឆរិយៈប្រទេសដូចគេដែរ»។
ចំណែកអ្នកនាំពាក្យគណបក្ស ហ៊្វុន ស៊ិនប៉ិច លោក ញេប ប៊ុនជិន មានប្រសាសន៍ថា គណបក្សរបស់លោក នឹងទទួលយកអាសនៈ៤១ ។ លោកថា លោកពេញចិត្តនឹងទទួលយក ហើយថាខិតខំធ្វើការងារយ៉ាងណាឲ្យពលរដ្ឋបានសុខ។
លោកថ្លែងថា «យើងទទួលយកដោយរីករាយ ហើយការទទួលយកនេះ ដោយខិតខំប្រឹងប្រែងបម្រើរាស្ត្រ ថ្វីត្បិតតែ អ្នកមើលឃើញយើងថា យ៉ាងណានោះ ជាការបកប្រែរបស់គេទេ។ ប៉ុន្តែយើងយកចំនួនណាមួយនោះ ដែលច្បាប់ប្រគល់ឲ្យគណបក្ស ហ៊្វុន ស៊ិនប៉ិច យកទៅប្រើការក្លាយទៅជាសហប្រយោជន៍ចំពោះរាស្ត្រ ចំពោះជាតិ ធ្វើម៉េចឲ្យរាស្ត្របានសុខ ស្ថេរភាពនយោបាយ»។
វីអូឌីមិនអាចទាក់ទងអ្នកនាំពាក្យគណបក្សខ្មែរអភិវឌ្ឍន៍សេដ្ឋកិច្ចបាននៅឡើយទេ។
កាលពីថ្ងៃទី១៦ ខែវិច្ឆិកា តុលាការកំពូល បានប្រកាសរំលាយគណបក្សសង្គ្រោះជាតិទៅតាមបណ្ដឹង ក្រសួងមហាផ្ទៃ។ ការប្ដឹងសុំរំលាយគណបក្សសង្គ្រោះជាតិរបស់ក្រសួងមហាផ្ទៃនេះ ធ្វើឡើងតាមបណ្ដឹង របស់គណបក្សចំនួន ២ គឺ គណបក្ស ហ្វ៊ុន ស៊ិនប៉ិច របស់សម្ដេចក្រុមព្រះ និងគណបក្សយុវជនកម្ពុជា របស់លោក ពេជ្រ ស្រស់៕