លោកនាយករដ្ឋមន្ត្រី ហ៊ុន សែន បានសម្រេចអនុញ្ញាតឲ្យសិស្ស និស្សិត ប្រឡងចូលក្របខណ្ឌវិជ្ជាជីវៈសុខាភិបាលចំនួន៣០ផ្នែក ដោយមិនកំណត់អាយុ ដោយហេតុផលថា កន្លងមកការកំណត់អាយុបង្កការលំបាកដល់អ្នកត្រូវប្រឡងនិងបាត់បង់ធនធានបម្រើការងារ។
លោកនាយករដ្ឋមន្ត្រីសេរសេរនៅលើហ្វេសប៊ុករបស់លោកកាលពីម្សិលមិញថា ការសម្រេចនេះគឺបន្ទាប់ពីការឃើញការលំបាករបស់សិស្សនិស្សិតនិងតម្រូវការធនធានមនុស្សក្នុងវិស័យសុខាភិបាល ហើយលោកក៏បានពិភាក្សាជាមួយរដ្ឋមន្ត្រីក្រសួងសុខាភិបាលក្នុងការកែប្រែលក្ខខណ្ឌមួយចំនួន។
នៅក្នុងអនុក្រឹត្យដែលលោកនាយករដ្ឋមន្ត្រីចុះហត្ថលេខាកាលពីថ្ងៃទី២៤ ខែមករា ឆ្នាំ២០១៧ បានកំណត់ផ្នែកចំនួន៣០ ដែលអាចប្រឡងចូលក្របខណ្ឌដោយមិនកំណត់អាយុ ក្នុងនោះរួមមានសាស្ត្រាចារ្យមហាបរិញ្ញា សាស្ត្រាចារ្យរង ពេទ្យឯកទេស វេជ្ជបណ្ឌិត និងឱសថការីជាដើម។
នៅក្នុងអនុក្រឹត្យនោះ លោកនាយករដ្ឋមន្ត្រីក៏បានបញ្ជាក់ថា ការប្រឡងចូលក្របខណ្ឌមន្ត្រីរាជការផ្សេងៗទៀតក៏ត្រូវបន្ធូបន្ថយអាយុដែរ ប៉ុន្តែលោកមិនបានបញ្ជាក់ថា ក្រសួងស្ថាប័នណាខ្លះ ហើយត្រូវបន្ថយដល់កម្រិតណានោះទេ៕