សិស្ស ១២នាក់នៅវិទ្យាល័យ ហ៊ុន សែន បាក់ចិញ្ជៀន ស្ថិតក្នុងស្រុកភ្នំក្រវាញ ខេត្តពោធិ៍សាត់ បានដួលសន្លប់ជាបន្តបន្ទាប់នៅព្រឹកថ្ងៃនេះ។
នាយករងនៃវិទ្យាល័យ ហ៊ុន សែន បាក់ចិញ្ជៀន លោក សុខ យឿន ប្រាប់វីអូឌីនៅថ្ងៃនេះថា សិស្សស្រី ១១នាក់ និងសិស្សប្រុសម្នាក់ បានដួលសន្លប់នៅជាបន្តបន្ទាប់នៅម៉ោង ៩ព្រឹកថ្ងៃនេះ បន្ទាប់ពីសិស្សទាំងនោះមានអាការៈថប់ដង្ហើម ហត់ និងក្ដៅខ្លួន។
គ្រូបង្រៀនរូបនេះ បានប្រាប់ថា សិស្សទាំងនោះ ត្រូវបានបញ្ជូនទៅព្យាបាលនៅមន្ទីរពេទ្យខេត្ត និងបានធូរស្រាលវិញហើយ។
បើតាមគ្រូបង្រៀនរូបនេះ សិស្សនៅក្នុងវិទ្យាល័យនេះ ក៏បានដួលសន្លប់ជាបន្តបន្ទាប់ម្ដងរួចមកហើយកាលពីឆ្នាំ២០១៧ បន្ទាប់ពីពួកគេស្ថិតក្នុងអការៈប្រហាក់ប្រហែលគ្នានេះដែរ។
នាយកប៉ុស្តិ៍នគរបាលឃុំបាក់ចិញ្ជៀន លោក ខាំ ធារិទ្ធិ ដែលបានចុះទៅពិនិត្យនៅកន្លែងកើតហេតុ អះអាងថា សិស្សដែលដួលសន្លប់នោះ អាចបណ្ដាលមកពីពួកគេគេងមិនបានគ្រប់គ្រាន់ រួមផ្សំជាមួយបរិស្ថាននៅទីនោះមិនស្អាតផង ក៏ធ្វើឲ្យពួកគេសន្លប់តែម្ដង។
លោក សុខ យឿន ឲ្យដឹងថា សិស្សនៅវិទ្យាល័យមានចំនួន ១០៦៦នាក់ ក្នុងនោះមានស្រី ៥៦៦នាក់៕