គណបក្សសង្គ្រោះជាតិ គ្រោងនឹងជ្រើសតាំងមេដឹកនាំថ្មីរបស់ខ្លួន នៅដើមខែមីនាខាងមុខនេះ បន្ទាប់ពីមេដឹកនាំគណបក្សនេះ បានប្រកាសលាលែងពីតំណែង កាលពីជាង ១០ថ្ងៃមុន។
នៅក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ គណបក្សសង្គ្រោះជាតិ បានប្រកាសថា គណៈបក្សប្រឆាំងមួយនេះ គ្រោងរៀបចំសមាជវិសាមញ្ញមួយ នៅព្រឹកថ្ងៃទី០២ ខែមីនា ខាងមុខនេះ នៅក្នុងទីស្នាក់ការកណ្ដាលរបស់គណបក្ស។
បើតាមសេចក្ដីប្រកាសព័ត៌មានដដែលនេះ ការបោះឆ្នោតជ្រើសតាំងប្រធាន និងអនុប្រធានគណបក្ស គឺជារបៀបវារៈសំខាន់នៅក្នុងសមាជនាពេលខាងមុខនេះ។
សមាជវិសាមញ្ញនេះ ត្រូវបានគេគ្រោងរៀបចំធ្វើឡើងជាង ២០ថ្ងៃក្រោយពីមេដឹកនាំគណបក្សសង្គ្រោះជាតិ លោក សម រង្ស៊ី បានប្រកាសលាលែងពីតំណែងជាប្រធានបក្ស កាលពីថ្ងៃទី១១ ខែកុម្ភៈកន្លងមកនេះ។
ការលាលែងពីតំណែងរបស់លោក សម រង្ស៊ី ត្រូវបានគេមើលឃើញថា បានកើតឡើងតែជាង ១០ថ្ងៃក្រោយពីលោកនាយករដ្ឋមន្ត្រី ហ៊ុន សែន បានព្រមានរំលាយគណបក្សប្រឆាំងមួយនេះ តាមរយៈការកែប្រែច្បាប់ស្ដីពីគណបក្សនយោបាយ៕