គណបក្សសង្គ្រោះជាតិ ដែលត្រូវបានរំលាយចោលទៅហើយនោះ បានបដិសេធទទួលស្គាល់លទ្ធផលនៃការបោះឆ្នោតជ្រើសតាំងសមាជិកព្រឹទ្ធសភានៅថ្ងៃនេះ ដោយថា ការបោះឆ្នោតនេះ ត្រូវបានធ្វើឡើងដោយខុសច្បាប់ និងផ្ទុយពីរដ្ឋធម្មនុញ្ញ។
ការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៤ ត្រូវបានកំណត់ធ្វើឡើងនៅថ្ងៃនេះ នៅតាមភូមិភាគទាំង ៨ នៅទូទាំងប្រទេស ដោយមានការចូលរួមបោះឆ្នោតពីអង្គបោះឆ្នោត ដែលជាអ្នកមានអាសនៈជាប់ឆ្នោត។
បើទោះបីជាមានការចូលរួមពីគណបក្សនយោបាយចំនួន ៤ក៏ដោយ ប៉ុន្តែ គណបក្សសង្គ្រោះជាតិ ដែលជាគូប្រជែងនយោបាយធំបំផុតជាមួយគណបក្សប្រជាជនកម្ពុជានោះ មិនត្រូវបានអនុញ្ញាតឲ្យចូលរួមក្នុងការបោះឆ្នោតអសកលនេះទេ បន្ទាប់ពីបក្សប្រឆាំងមួយនេះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន។
ខណៈដែលការបោះឆ្នោតអសកលនេះកំពុងប្រព្រឹត្តទៅនៅព្រឹកថ្ងៃនេះ គណបក្សសង្គ្រោះជាតិបានចេញសេចក្ដីថ្លែងការណ៍ពីក្រៅប្រទេស នៅថ្ងៃនេះ ដោយបានបញ្ជាក់ជំហររបស់ខ្លួនប្រឆាំងដាច់ខាតនឹងការរៀបចំការបោះឆ្នោតនេះ។
ក្នុងសេចក្ដីថ្លែងការណ៍ដដែលនោះ អតីតបក្សប្រឆាំងមួយនេះ បានចាត់ទុកការបោះឆ្នោតនេះថា ត្រូវបានធ្វើឡើងដោយខុសច្បាប់ និងផ្ទុយពីរដ្ឋធម្មនុញ្ញ។
ជាងនេះទៅទៀត អតីតបក្សប្រឆាំងដដែលនេះ បានបញ្ជាក់ជំហរថា ខ្លួននឹងមិនទទួលស្គាល់លទ្ធផលនៃការបោះឆ្នោតនេះទេ ដោយថា អង្គបោះឆ្នោតដែលជាតំណាងរាស្រ្ត និងក្រុមប្រឹក្សាឃុំ-សង្កាត់ចំនួន ៥០៦២រូប ពុំមែនជាតំណាងឆន្ទៈរបស់ពលរដ្ឋ ដែលកើតចេញពីការបោះឆ្នោតជ្រើសតាំងដោយផ្ទាល់ពីប្រជាពលរដ្ឋ ហើយការបោះឆ្នោតនេះ មិនមានវត្តមានបក្សសង្គ្រោះជាតិដែលជាតំណាងឆន្ទៈពលរដ្ឋកន្លះប្រទេស ដែលមានអាសនៈនៅក្នុងសភា និងនៅក្រុមប្រឹក្សារាជធានី-ក្រុង ស្រុក-ខណ្ឌ និងឃុំ-សង្កាត់។
ជាមួយគ្នានោះ គណបក្សសង្គ្រោះជាតិក៏បានអំពាវនាវទៅបណ្ដាប្រទេសនានា និងអង្គការសហប្រជាជាតិ កុំឲ្យទទួលស្គាល់លទ្ធផលនៃការបោះឆ្នោតនេះ និងជួយធ្វើអន្តរាគមន៍ ដើម្បីស្ដារឡើងវិញនូវលទ្ធិប្រជាធិបតេយ្យ និងជំរុញឲ្យមានការដោះលែងប្រធានបក្សលោក កឹម សុខា ផងដែរ ក៏ដូចជាធានាឲ្យមានការបោះឆ្នោតដោយសេរី ត្រឹមត្រូវ និង យុត្តិធម៌នាពេលខាងមុខផងដែរ។
គណបក្សសង្គ្រោះជាតិ ត្រូវបានតុលាការកំពូលសម្រេចរំលាយចោលកាលពីខែវិច្ឆិកាឆ្នាំមុន ហើយប្រធានបក្សនេះ លោក កឹម សុខា នៅតែបន្តស្ថិតនៅក្រោមការឃុំខ្លួន ចាប់តាំងពីលោកត្រូវបានចាប់ខ្លួនកាលពីដើមខែកញ្ញាឆ្នាំមុន ក្រោមការចោទប្រកាន់ពីរដ្ឋាភិបាលថា «ក្បត់ជាតិ»។
ចំណែកឯអាសនៈជាប់ឆ្នោតទាំងអស់របស់បក្សប្រឆាំងមួយនេះ ត្រូវបានដកហូត និងបែងចែកទៅឲ្យគណបក្សផ្សេង ដែលពលរដ្ឋពុំបានបោះឆ្នោតឲ្យនៅអំឡុងការបោះឆ្នោតជាតិឆ្នាំ២០១៣ និងការបោះឆ្នោតក្រុមប្រឹក្សាឃុំសង្កាត់នៅឆ្នាំ២០១៧កន្លងមកនេះ៕