សហភាពអឺរ៉ុប នឹងពិចារណាដាក់ទណ្ឌកម្មថ្មីបន្ថែមទៀតមកលើប្រទេសកម្ពុជា ក្នុងនោះមានទាំងការលុបចោលការអនុគ្រោះលើផ្នែកពាណិជ្ជកម្មសម្រាប់ប្រទេសកម្ពុជាផងដែរ ជុំវិញអ្វីដែលសហភាពអឺរ៉ុបមើលឃើញថា រដ្ឋាភិបាលកម្ពុជាបានបង្ក្រាបទៅលើបក្សប្រឆាំងកាលពីឆ្នាំមុន។
សហភាពអឺរ៉ុប បានទាមទារទៅរដ្ឋាភិបាលកម្ពុជា ឲ្យស្ថារលទ្ធិប្រជាធិបតេយ្យឡើងវិញ និងអនុញ្ញាតឲ្យគណបក្សសង្គ្រោះជាតិ ដែលត្រូវបានរំលាយចោលកាលពីខែវិច្ឆិកាឆ្នាំមុននោះ ឲ្យវិលចូលរួមក្នុងការបោះឆ្នោតជាតិនាខែកក្កដាខាងមុខឡើងវិញ ប៉ុន្តែ រហូតមកដល់ពេលនេះ គ្មានសញ្ញាណាមួយបង្ហាញថា រដ្ឋាភិបាលកម្ពុជាដឹកនាំដោយគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន នឹងផ្លាស់ប្ដូរជំហររបស់ខ្លួននោះឡើយ។
ខណៈដែលកម្ពុជានៅតែមិនផ្លាស់ប្ដូរជំហរងាកទៅស្ដារលទ្ធិប្រជាធិបតេយ្យឡើងវិញនោះ ក្រុមរដ្ឋមន្ត្រីការបរទេសសហភាពអឺរ៉ុប ដែលមានសមាជិក ២៨ប្រទេស គ្រោងនឹងជជែកជាថ្មីម្ដងទៀតអំពីបញ្ហាកម្ពុជា និងភូមា នៅក្នុងកិច្ចប្រជុំមួយនៅទីក្រុងប៊្រុចស៊ែល នៅថ្ងៃចន្ទសប្ដាហ៍ក្រោយនេះ។ នេះបើតាមការចុះផ្សាយរបស់សារព័ត៌មាន Financial Times។
បើតាមសារព័ត៌មានដដែលនេះ ក្រុមរដ្ឋមន្ត្រីការបរទេសអឺរ៉ុប ត្រូវបានគេរំពឹងថា នឹងរំឭកទៅលោក ហ៊ុន សែន ថា វិធានការនានាអាចនឹងកើតមាន ប្រសិនបើស្ថានភាពនៅមុនការបោះឆ្នោតនាខែកក្កដាខាងមុខ នៅតែមិនត្រូវបានកែលម្អឲ្យបានល្អប្រសើរឡើងនោះ។
កាសែតដដែលនេះ បានចុះផ្សាយបន្តថា ក្រុមប្រមុខការទូតអឺរ៉ុប ក៏នឹងបញ្ជាឲ្យត្រួតពិនិត្យឡើងវិញលើកិច្ចព្រមព្រៀងពាណិជ្ជកម្ម «អ្វីគ្រប់យ៉ាង លើកលែងអាវុធ» ដែលបានផ្ដល់ភាពអនុគ្រោះលើទំនិញកម្ពុជា ក្នុងនោះមានទាំងផលិតផលកាត់ដេរ ដែលត្រូវបាននាំចូលទៅសហភាពអឺរ៉ុបដោយឥតបង់ពន្ធគយ។
ប្រទេសអាល្លឺម៉ង់ បានចាត់វិធានការថ្មីមួយប្រឆាំងនឹងកម្ពុជាកាលពីសប្ដាហ៍នេះ ដោយបានសម្រេចបញ្ឈប់ការផ្ដល់ទិដ្ឋាការអនុគ្រោះសម្រាប់ការធ្វើដំណើរឯកជនរបស់សមាជិករដ្ឋាភិបាលកម្ពុជា ក្នុងនោះមានទាំងលោក ហ៊ុន សែន និងក្រុមគ្រួសាររបស់លោកផងដែរ។
សហភាពអឺរ៉ុបបានចាត់វិធានការជាបន្តបន្ទាប់ប្រឆាំងនឹងមេដឹកនាំ និងសមាជិកជាន់ខ្ពស់របស់រដ្ឋាភិបាលកម្ពុជា បន្ទាប់ពីគណបក្សសង្គ្រោះជាតិ ដែលទទួលបានសំឡេងគាំទ្រពីពលរដ្ឋប្រហែល ៣លានសំឡេងនោះ ត្រូវបានតុលាការកំពូលសម្រេចរំលាយចោលកាលពីពាក់កណ្ដាលខែវិច្ឆិកាឆ្នាំមុន និងការបន្តឃុំខ្លួនមេដឹកនាំបក្សប្រឆាំង លោក កឹម សុខា ចាប់តាំងពីលោកត្រូវបានចាប់ខ្លួនកាលពីដើមខែកញ្ញាឆ្នាំមុន៕
