អ្នកមានជម្លោះដីធ្លីមកពីខេត្តសៀមរាបរកអន្តរាគមន៍ពីនាយករដ្ឋមន្ត្រីឲ្យជួយទប់ស្កាត់ការបណ្តេញពីសំណាក់មន្ត្រីយោធាដែលពួកគេចោទថាកំពុងគំរាមកំហែងបណ្តេញពួកគេជាង១០០គ្រួសារចេញពីលំនៅដ្ឋានដោយគ្មានការទប់ស្កាត់ពីអាជ្ញាធរមូលដ្ឋាន។
អ្នកតវ៉ាម្នាក់ក្នុងចំណោមអ្នកតវ៉ាជាង១០០នាក់ផ្សេងទៀតលោក ស្រី ពាន់ អាយុ៤៥ឆ្នាំ រស់នៅភូមិសែនជ័យ ឃុំកន្ទួត ស្រុកស្វាយលើ ខេត្តសៀមរាប ឲ្យអ្នកសារព័ត៌មានដឹងក្រោយដាក់ពាក្យបណ្តឹងទៅមន្ត្រីខុទ្ទការល័យនាយករដ្ឋមន្ត្រី នាថ្ងៃទី២៥ខែមីនានេះថាបច្ចុប្បន្ននេះមន្ត្រីយោធា៥រូបនៅភូមិភាគ៤បានបានប្រើអាវុធគំរាមកំហែងពួកគាត់ជាង១០០គ្រួសារ ឲ្យចាកចេញពីលំនៅដ្ឋានដែលលោកថាគ្មានកិច្ចអន្តរាគមន៍ទប់ស្កាត់ពីអាជ្ញាធរមូលដ្ឋាន។
បុរសរូបនោះអំពាវនាវឲ្យនាយករដ្ឋមន្ត្រីជួយអន្តរាគមន៍ទៅលើមន្ត្រីយោធានោះដើម្បីឲ្យពួកគាត់បានអាស្រ័យផលលើដី៩៧១ដូចធម្មតាវិញ។ លោកបន្តថា៖ “សុំឲ្យគាត់ជួយអន្តរាគមន៍ឬជួយដោះស្រាយដើម្បីឲ្យពួកឃើងខ្ញុំទាំង១៣៩គ្រួសារនឹងបានដីសង់លំនៅដ្ឋាននិងអាស្រ័យផលនិងឲ្យជៀសផុតការប្រមាថដេញហើយនិងគំរាម ហើយនិងបណ្តេញចេញពីមូលដ្ឋានរបស់ទាហានយោធាយុទ្ធភូមិភាគទី៤ដែលដឹកនាំដោយលោក ទេព រួន លោក ស៊ាង ស្រាង លោក ហៅ ហឺយ លោក ម៉ុត លោក យ៉ន ដែលគាត់បញ្ជាផ្ទាល់។ ហើយលោក ហឺយ ហ្នឹងគាត់បានយកកំាភ្លើងទៅបាញ់និងវាយប្រជាពលរដ្ឋ ហើយលោក យ៉ន ហ្នឹងគាត់បានដក់យកប៉ាស៊ីនបាញ់ថ្មាំ និងធុងបាញ់ថ្នាំដំឡូងដែលបានដាំហ្នឹងក៏គាត់ដកចេញអត់ឲ្យដាំទេ ហើយខ្នុរដូងស្វាយក៏គាត់កាប់ ហើយគាត់បានយកអេស្ការ(គ្រឿងចក្រ)ទៅកាយដីហ្នឹងគាត់មិនឲ្យនៅគាត់ថាដីហ្នឹងជាដីរបស់គាត់“។
អ្នកតវ៉ាម្នាក់ទៀតគឺអ្នកស្រី សាន ស្រែ អាយុ៣២ឆ្នាំបានអះអាងដែរថាជម្លោះអូសបន្លាយជិត៤ឆ្នាំមកនេះស្រ្តីរូបនោះថា ធ្វើឲ្យអ្នកភូមិសម្រេចចេញធ្វើចំណាកស្រុកទៅរកការងារធ្វើនៅប្រទេសថៃទាំងប្រឈមនឹងគ្រោះថា្នក់ ចំណែកអ្នកនៅក្នុងភូមិ ជួបនឹងភាពអត់ឃ្លានគ្មានលទ្ធភាពបញ្ជូនកូនៗទៅសាលា។
ស្ត្រីរូបនោះទទួចឲ្យរដ្ឋាភិបាលជួយអន្តរាគមន៍បន្ទាន់ឲ្យពួកគេបានបានធ្វើស្រែចំការលើដីនោះដោយគ្មានភ័យខ្លាចនឹងការគំរាមកំហែងនិងការបណ្តេញចេញ។ អ្នកស្រីបន្ថែមថា៖ “យើងខ្ញុំសូមសំណូមពរឲ្យសម្តេចជួយបងប្អូនយើងខ្ញុំនេះផងនិងគ្រួសារយើងខ្ញុំនេះ ព្រោះនាងខ្ញុំនេះចង់បានតែដីទេ អត់ចង់បានអីទេ ចង់បានឲ្យវាសុខស្រួលកុំឲ្យទាហានគាត់មកអុកឡុកទៀតប៉ុណ្ណោះឯងចា ពួកគេទាហានគាត់មានប្រាក់ខែចាយមានអង្កររបបស៊ី តែចំណែកពួកខ្ញុំជាប្រជាពលរដ្ឋបើមិនឲ្យធ្វើ(ដីស្រែ)ខ្ញុំគ្មានស្អីស៊ីទេ“។
មន្ត្រីខុទ្ទការល័យនាយករដ្ឋមន្ត្រីគឺលោក គង់ ចំរើន សុំមិនធ្វើអត្ថាធិប្បាយទៅនឹងសំនួរអ្នកសារព័ត៌មានដែលសួរពីចំណាត់ការបែបណាតបនឹងពាក្យបណ្តឹងរបស់អ្នកភូមិនេះទេ។ ប៉ុន្តែនៅពេលចុះហត្ថលេខាទទួលពាក្យបណ្តឹងលោកបានប្រាប់អ្នកភូមិថារងចាំទទួលព័ត៌មានពីមន្ត្រីជំនាញរបស់រដ្ឋាភិបាលនៅពេលក្រោយ។
តាមពាក្យបណ្តឹងរបស់អ្នកភូមិស្នើនាយករដ្ឋមន្ត្រីអន្តរាគមន៍យកដីទំហំ៩៧១ហិកតាឲ្យពួកគាត់បានកាន់កាប់ឡើងវិញ។ ឲ្យមន្ត្រីយោធាទាំងនោះសាងសង់ផ្ទះ២២ខ្នងជូនពួកគេវិញ។ ឲ្យមន្ត្រីយោធាទំាងនោះផ្តល់សំណងជាថវិកាចំនួន៤ម៉ឺនដុល្លារ សម្រាប់សំណងការខូចខាតបាត់បង់សម្ភារៈកសិកម្មដែលអ្នកភូមិថាមន្ត្រីយោធាទាំងនោះបានរឹបអូសនិងឈូសកម្ទេចកន្លងទៅ។
VODមិនអាចស្វែងរកការឆ្លើយតបពីមន្ត្រីយោធាដែលរងការចោទប្រកាន់ពីអ្នកភូមិនោះបានទេ ចំណែកមេបញ្ជាការភូមិភាគ៤លោក ជា ម៉ន មិនអាចទាក់ទងបាន។ ចំណែកអភិបាលស្រុកស្វាយលើលោក ស៊ិក ប៊ុនស៊ិន អះអាងថាជាប់រវល់។
ប៉ុន្តែមេឃុំកន្ទួតលោក ពៀត ណារ៉ន អះអាងថាជម្លោះដីធ្លីអូបន្លាយនៅតំបន់នោះលោកថាពលរដ្ឋធ្លាប់ដាក់ពាក្យបណ្តឹងមកអាជ្ញាធរច្រើនដងហើយដែលលោកថាពាក្យបណ្តឹងអ្នកភូមិបានប្តឹងមន្ត្រីយោធានៅភូមិភាគ៤នោះថាបានព្យាយាមយកដីពួកគាត់ តែលោកថាវិធានការនោះហួសពីសមត្ថកិច្ចរបស់អាជ្ញាធរមូលដ្ឋាន។
ទោះជាយ៉ាងណាមេឃុំរូបនោះចង់ឃើញដំណោះស្រាយពីថ្នាក់ជាតិដោយមិនឲ្យពលរដ្ឋណាម្នាក់ត្រូវបានបណ្តេញចេញ។ លោកបន្ថែមថា៖ “បានថាធ្វើម៉េចឲ្យវាសុក្រឹតណាអូន! ទោះកងទ័ពគាត់ធ្វើមុន(នៅមុន)ឬក៏ពលរដ្ឋគាត់ធ្វើមុនយ៉ាងណាក៏ដោយ សុំថាបើដីប្រជាពលរដ្ឋសុំឲ្យចែកឬឃ្វៀលដីនោះឲ្យមកប្រជាពលរដ្ឋវិញ បើទោះជាកងទ័ពគាត់ឈរជើង(ទោះជាកន្លែងកងទ័ពឈរជើង)សុំឲ្យឃ្វៀលកុំឲ្យមានបញ្ហាប្រជាពលរដ្ឋនិងកងទ័ព“។
បើតាមអ្នកតវ៉ាពួកគាត់បានមករស់នៅតំបន់នោះតាំងពីឆ្នាំ២០០០ពួកគេថាអ្នកភូមិទាំងនោះមានការទទួលស្គាល់ពីអាជ្ញាធរមូលដ្ឋានតាមរយៈលិខិតស្នាមនានា។
ពួកគាត់ឲ្យដឹងដែរថាលុះដល់ចុងឆ្នាំ២០១៣និងដើមឆ្នាំ២០១៤ទើបមន្ត្រីយោធាទាំង៥រូបនោះមកអះអាងថាដីដែលពួកគាត់មកអាស្រ័យផលយូរហើយនោះ ជាដីរបស់មន្ត្រីយោធាប៉ុន្មាននាក់នោះទៅវិញ បញ្ហានេះពួកគេថាបង្កឲ្យមានជម្លោះរហូតមានការគំរាមបណ្តេញចេញ៕
