មេដឹកនាំគណបក្សសង្រ្គោះជាតិ បានប្រាប់ឲ្យអ្នកគាំទ្រខ្លួន បញ្ឈប់ចងចាំលេខ៧ថាជាលេខរបស់គណបក្សនេះទៀតទៅ។
នៅក្នុងពិធីផ្សព្វផ្សាយផ្ទៃក្នុង នូវគោលនយោបាយអាទិភាព សម្រាប់ការបោះឆ្នោតឃុំ-សង្កាត់ នៅខេត្តកំពង់ធំនាព្រឹកថ្ងៃ ២៥ខែមីនាឆ្នាំ២០១៧ លោក កឹម សុខា ប្រធានគណបក្សសង្រ្គោះជាតិ ថ្លែងថា “សូមបញ្ឈប់ទម្លាប់ជាទូទៅថា គណបក្សសង្គ្រោះជាតិលេខ៧ទៀតទៅ នាំឲ្យមាន ការភាន់ច្រឡំ”។នេះបើតាមហ្វេសប៊ុករបស់លោក នៅថ្ងៃនេះ។
លោក កឹម សុខា ពន្យល់ថា លេខរៀងគណបក្សសង្គ្រោះជាតិ សម្រាប់ការបោះឆ្នោតឃុំ-សង្កាត់ឆ្នាំ២០១៧នេះ អាស្រ័យលើការចាប់លេខរៀងតាមឃុំ-សង្កាត់នីមួយៗ ហើយមិនមែនសុទ្ធតែលេខ៧គ្រប់ឃុំ-សង្កាត់ ដូចការបោះឆ្នោតតំណាងរាស្រ្ដឆ្នាំ២០១៣ទេ។
គណៈកម្មាធិការជាតិរៀបចំការបោះឆ្នោត កំពុងតែរៀបចំចាប់លេខរៀងសម្រាប់គណបក្សនយោបាយនីមួយៗដែលមានបេក្ខជនឈរឈ្មោះជាបេក្ខភាពក្រុមប្រឹក្សាឃុំ សង្កាត់ឆ្នាំ២០១៧នេះ ដែលការបោះឆ្នោតនឹងធ្វើនៅថ្ងៃទី៤ខែមិថុនាខាង៕
