ស្ថាប័នសិទ្ធិមនុស្សកំពូលរបស់អង្គការសហប្រជាជាតិ កាលពីថ្ងៃម្សិលមិញនេះ បានឯកភាពថា នឹងបញ្ជូនមន្ត្រីអន្តរជាតិទៅស៊ើបអង្កេតលើការកាប់សម្លាប់ ការរំលោភបំពានផ្លូវភេទ និងការធ្វើទារុណកម្មពីសំណាក់កងកម្លាំងសន្តិសុខភូមា ទៅលើជនជាតិភាគតិចមូស្លីមរ៉ូហ៊ីងយ៉ា នៅរដ្ឋរ៉ាក់ឃីន។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
បើ Reuters ដដែល អគ្គរដ្ឋទូតភូមាប្រចាំអង្គការសហប្រជាជាតិ លោក ទីន លីន បានជំទាស់ទៅនឹងការសម្រេចថ្មីនេះ ដោយថា ជារឿងមិនអាចទទួលយកបាន។ តំណាងរដ្ឋាភិបាលភូមាបាននិយាយថា គណៈកម្មការស៊ើបអង្កេតរបស់ភូមា ទើបតែសាកសួរទៅជនរងគ្រោះ ដែលបានភៀសខ្លួនទៅប្រទេសបង់ក្លាដែស ហើយនឹងចេញផ្សាយលទ្ធផលរកឃើញនៅខែសីហាខាងមុខនេះ។
ក្រុមប្រឹក្សាសិទ្ធិមនុស្សអង្គការសហប្រជាជាតិ បានអនុម័តសេចក្ដីសម្រេចមួយដោយគ្មានការបោះឆ្នោត ដោយសេចក្ដីសម្រេចនោះស្នើឡើងដោយសហភាពអឺរ៉ុប និងទទួលបានការគាំទ្រពីបណ្ដាប្រទេសនានា ក្នុងនោះមានទាំងអាមេរិកផងដែរ។ សេចក្ដីសម្រេចនោះ បានអំពាវនាវឲ្យធានានូវគណនេយ្យភាពសម្រាប់ជនដៃដល់ និងយុត្តិធម៌សម្រាប់ជនរងគ្រោះ។
របាយការណ៍អង្គការសហប្រជាជាតិ ដែលចេញផ្សាយកាលពីខែមុន បានបង្ហាញថា កងកម្លាំងសន្តិសុខភូមា បានប្រព្រឹត្តអំពើកាប់សម្លាប់មនុស្សដ៏រង្គាល និងបានរំលោភបូកលើជនជាតិរ៉ូហ៊ីងយ៉ា ដែលអំពើទាំងនេះ ត្រូវបានគេប្រៀបប្រដូចទៅនឹងឧក្រិដ្ឋកម្មប្រឆាំងមនុស្សជាតិ និងការបោសសម្អាតជាតិសាសន៍៕
