គណបក្សសង្គ្រោះជាតិបានវាយតម្លៃថាស្ថានការណ៍នយោបាយបច្ចុប្បន្ននេះស្ថិតក្នុង”សភាពធ្ងន់ធ្ងរ”និងគ្រោះថ្នាក់ដល់គោលការណ៍ប្រជាធិបតេយ្យ។
នៅថ្ងៃចន្ទនេះ គណបក្សសង្គ្រោះជាតិបានបើកកិច្ចប្រជុំគណៈកម្មាធិការអចិន្ត្រយ៍របស់ខ្លួន ដោយបានផ្តោតទៅលើស្ថានភាពនយោបាយបច្ចុប្បន្ននិងផែនការសកម្មភាពរបស់គណបក្ស។
ក្នុងសេចក្តីប្រកាសព័ត៌មានចុះថ្ងៃទី ២៥ មេសា គណបក្សសង្គ្រោះជាតិឲ្យដឹងថាក្រោយពីប្រជុំ គណបក្សបានវាយតម្លៃពីស្ថានការណ៍នយោបាយរបស់កម្ពុជាបច្ចុប្បន្នថាកំពុងស្ថិតក្នុងស្ថានភាពគ្រោះថ្នាក់ដល់ប្រជាធិបតេយ្យ សិទ្ធិមនុស្ស នីតិរដ្ឋនិងការបោះឆ្នោត។
សេចក្តីប្រកាសព័ត៌មានបញ្ជាក់ថា៖ “ គណៈកម្មាធិការអចិន្ត្រៃយ៍គណបក្ស បានវាយតម្លៃថាស្ថានការណ៍នយោបាយបច្ចុប្បន្នមានសភាពធ្ងន់ធ្ងរ ដែលគ្រោះថ្នាក់ដល់គោលការណ៍ប្រជាធិបតេយ្យ សិទ្ធិមនុស្ស នីតិរដ្ឋនិងការបោះឆ្នោត នាពេលខាងមុខ”។
សេចក្តីប្រកាសបន្តថាគណៈកម្មាធិការអចិន្រ្តៃយ៍បានសម្រេចប្រើប្រាស់យន្តការដែលគណបក្សមាន ដើម្បីទាញស្ថានការណ៍នយោបាយបច្ចុប្បន្នឲ្យវិលត្រឡប់មកស្ថានភាពប្រក្រតីឡើងវិញនិងបន្តសកម្មភាពឆ្ពោះទៅមូលដ្ឋានឲ្យកាន់តែខ្លាំងក្លា។
គួរបញ្ជាក់ថាមួយរយៈចុងក្រោយនេះ គណបក្សសង្រ្គោះជាតិបានប្រឈមនឹងបញ្ហាមួយចំនួន រួមមាន ប្រធានគណបក្ស លោក សម រង្សី បាននិរទេសខ្លួនឯងគេចចេញពីការចាប់ខ្លួន សមាជិកគណបក្ស២រូបគឺលោកញ៉យ ចំរើន និងលោក គង់ សភា ត្រូវបានជនដៃដល់វាយឲ្យរងរបួស លោក កឹម សុខា ត្រូវដកតំណែងពីអនុប្រធានទី១នៃសភា ការចាប់ខ្លួនសមាជិកសភាលោក អំ សំអាននិងសមាជិកព្រឹទ្ធសភាលោក ហុង សុខ ហួរ និងរឿងអាស្រូវស្នេហារបស់កឹម សុខា ដែលអាចឈានទៅដល់ការចាប់ខ្លួនរូបលោក៕
