ការព្យាករណ៍បង្ហាញថាអាកាសធាតុនៅកម្ពុជានឹងចុះកម្តៅបន្តិចវិញចាប់ពីចុងខែនេះទៅ ប៉ុន្តែក្រសួងធនធានទឹក និងឧតុនិយមបានអំពាវនាវឲ្យមានការប្រុងប្រយ័ត្នពីគ្រោះធម្មជាតិដោយសារមានភ្លៀងកក់ខែ។
ក្នុងសេចក្តីជូនដំណឹង ក្រសួងធនធានទឹក និងឧតុនិយម បានឲ្យដឹងថាអាកាសធាតុនឹងថយកម្តៅបន្តិចវិញ ចាប់ពីថ្ងៃទី២៨ខែមេសានេះដល់ថ្ងៃទី៣ខែឧសភា ដោយសីតុណ្ហភាពខ្ពស់បំផុតត្រឹម៤០ អង្សានៅតំបន់ខ្ពង់រាប ខណៈតំបន់ទំនាបសីតុណ្ហភាពខ្ពស់បំផុត៣៩ អង្សា និងតំបន់សមុទ្រសីតុណ្ហភាពខ្ពស់បំផុតត្រឹម៣៦អង្សា។
ក្រសួងបានព្យាករណ៍ថា ចាប់ពីថ្ងៃទី២៨ដល់ថ្ងៃទី៣ខែឧសភា នឹងមានភ្លៀងធ្លាក់ពីតិចទៅមធ្យម ហើយមានផ្គររន្ទះ និងខ្យល់កន្ត្រាក់ នៅខេត្តព្រះវិហារ កំពង់ធំ រតនគិរី មណ្ឌលគិរី ស្ទឹងត្រែង ក្រចេះ កំពងចាម ត្បូងឃ្មុំ ព្រៃវែង និងស្វាយរៀង៕