ប្រធានាធីបតីអាមេរិក លោក ដូណាល់ ត្រាំ បានថ្លែងនៅថ្ងៃនេះថា ក្រុមប្រឹក្សាសន្តិសុខអង្គការសហប្រជាជាតិ ត្រូវតែប្រុងប្រៀបខ្លួនឲ្យបានរួចរាល់ដើម្បីដាក់ទណ្ឌកម្មកាន់តែតឹងរឹងបន្ថែមទៀតទៅលើកូរ៉េខាងជើង ជុំវិញកម្មវិធីនុយក្លេអ៊ែរ និងមីស៊ីលរបស់ប្រទេសនេះ ដោយលោក ត្រាំ ហៅស្ថានភាពបច្ចុប្បន្ននេះថា មិនអាចទទួលយកបាន។ នេះដោយយោងតាមការចុះផ្សាយរបស់ទីភ្នាក់ងារ AFP។
សម្ដីរបស់លោក ត្រាំ ប្រាកដជាបង្កភាពតានតឹងជាថ្មីម្ដងទៀត ខណៈដែលកូរ៉េខាងជើងជំរុញកម្មវិធីគ្រាប់មីស៊ីលរបស់ខ្លួន។ រដ្ឋឯកោកូរ៉េខាងជើង ត្រូវបានគេជឿថា កំពុងរៀបចំសាកល្បងគ្រាប់បែកនុយក្លេអ៊ែរលើកទី៦ ហើយថ្មីៗនេះ បានចាប់ខ្លួនពលរដ្ឋអាមេរិកម្នាក់ ដែលនោះគឺជាពលរដ្ឋអាមេរិកទី៣ហើយ ដែលត្រូវបានក្រុងព្យុងយ៉ាងចាប់ខ្លួន។
លោក ត្រាំ បានថ្លែងថា កម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើង គឺជាការគំរាមកំហែងដល់ពិភពលោក ហើយកូរ៉េខាងជើងគឺជាបញ្ហាដ៏ធំរបស់ពិភពលោក៕