ប្រជាពលរដ្ឋខ្មែរ ពិសេសអ្នកចិញ្ចឹម និងបរិភោគសាច់ជ្រូកនៅតែបង្ហាញការព្រួយបារម្ភពីបញ្ហាសុខភាព និង ជីវិភាពរបស់ពួកគាត់ ដោយសារការនាំជ្រូកចូលពីមានវៀតណាម ទាំងមានច្បាប់ និង មិនមានច្បាប់នៅតែបន្តកើតមានច្រើន។
មួយរយៈកាលចុងក្រោយនេះ មានភាពចម្រូងចម្រាស់ច្រើនពីការនាំជ្រូកចូលពីវៀតណាម ដែលសមាគមន៍ចិញ្ចឹមជ្រូកក្នុងស្រុកអះអាងថា ការនាំចូលទាំងនោះមានទាំងស្របច្បាប់ និង មិនស្របច្បាប់ ដែលធ្វើឲ្យប៉ះពាល់ដល់តម្លៃជ្រូកក្នុងស្រុក ហើយម្យ៉ាងទៀតអាចប៉ះពាល់ដល់សុខភាពអ្នកបរិភោគព្រោះមិនពិនិត្យសុខភាពជ្រូកទាំងនោះបានត្រឹមត្រូវ។ ក្រោយមកមានការចេញវិធានការទាំងក្រសួងកសិកម្ម និង ស្ថាប័នពាក់ផ្សេងៗទៀត ដើម្បីដោះស្រាយបញ្ហានាំជ្រូកចូលពីវៀតណាមនេះ។
ប៉ុន្តែអគ្គស្នងការដ្ឋាននគរបាលជាតិចុះផ្សាយភ្ជាប់ជាមួយរូបថតផងឲ្យដឹងថា ល្ងាចថ្ងៃទី២៣ខែឧសភា មានរថយន្តពីរគ្រឿងដឹកជ្រូកដែលគេស្គាល់ថា យកពីវៀតណាម តាមផ្លូវជាតិលេខ៥ ឆ្លងកាត់ចំណុច ស្រុកអង្គរបុរី ខេត្តបន្ទាយមានជ័យ ហើយជ្រូកទាំងនេះត្រូវចែកចាយនៅក្នុងខេត្តបន្ទាយមានជ័យតែម្តង។
ពលរដ្ឋបានថ្លែងប្រាប់គេហទំព័រអគ្គស្នងការដ្ឋាននគរបាលជាតិថា ពួកគេមានការព្រួយបារម្ភហើយស្នើឲ្យអាជ្ញាធរមានវិធានការទប់ស្កាត់ករណីនេះឲ្យបានទាន់ពេល៕
