នាយករដ្ឋមន្ដ្រីកម្ពុជា ដែលកាន់អំណាចជាង៣០ឆ្នាំមកនោះ នៅថ្ងៃព្រហស្បតិ៍នេះបានប្រកាសថា បើមានការផ្ទេរអំណាច គឺមានតែផ្ទេរឲ្យទៅកូនចៅនៃគណបក្សរបស់លោក មិនមែនផ្ទេរឲ្យទៅគណបក្សប្រឆាំងនោះទេ។
ក្នុងពិធីជួបសំណេះសំណាលជាមួយគ្រីស្ទបរិស័ទនៅកម្ពុជា នាព្រឹកថ្ងៃទី២៥ ខែឧសភា ឆ្នាំ២០១៧ សែន ក្រៅតែពីព្រមានមេដឹកនាំគណបក្សសង្គ្រោះជាតិលោក កឹម សុខា លោកនាយករដ្ឋមន្ដ្រី ហ៊ុន សែន បានប្រកាសថា បើសិនកម្ពុជាមានការផ្លាស់ប្ដូរថ្នាក់ដឹកនាំរដ្ឋាភិបាលមែននោះ លោកថា គឺមានតែកូនចៅគណបក្សប្រជាជនកម្ពុជាប៉ុណ្ណោះ ជាអ្នកគួរដឹកនាំប្រទេសបន្ដ មិនមែនគណបក្សប្រឆាំងនោះទេ។
លោកថ្លែងថា៖ «អ្នកឯងថាខ្ញុំក្រាញអំណាច តែខ្ញុំបន្តអំណាចទេ ប៉ុន្តែអ្នកឯងទេដែលមកដណ្តើមអំណាចគណបក្សប្រជាជនបន្តការអភិវឌ្ឍនិងសន្តិភាព។ កុំសង្ឃឹមថាបានទៅលើអ្នកឯងឲ្យសោះ។ បើគេផ្ទេរ គឺផ្ទេរឲ្យ កូនទេវត្តាហើយ ហើយគណបក្សប្រជាជន ក៏នឹងផ្ទេរទៅឲ្យមនុស្សជំនាន់ក្រោយរបស់បក្សដែរ»។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា លោកមិនចាប់អារម្មណ៍នឹងប្រសាសន៍របស់លោក ហ៊ុន សែន ទេ ដោយលោកអំពាវនាវឲ្យពលរដ្ឋទៅបោះឆ្នោតឃុំសង្កាត់ ដើម្បីផ្លាស់ប្តូរមេដឹកនាំថ្មី ទើបធ្វើឲ្យសង្គមជាតិមានសន្តិភាព។
សាស្ដ្រាចារ្យនយោបាយលោក សូរ ចន្ថា យល់ថា ការលើកឡើងរបស់លោកនាយករដ្ឋមន្ដ្រី ជាទស្សនៈហួសសម័យ ដោយថា ក្នុងសង្គមប្រជាធិបតេយ្យ បណ្ដាគណបក្សអាចចូលរួមការបោះឆ្នោតដោយស្មើភាព ដើម្បីប្រកួតប្រជែង ទៅដឹកនាំរដ្ឋាភិបាល ពោលគឺមិនមែនផ្ទេរអំណាចបន្ដទៅកូនចៅនោះទេ។
លោកថា អ្នកនយោបាយនៅកម្ពុជា គួរគោរពឆន្ទៈ និងការចង់បានរបស់ពលរដ្ឋ ទើបជាការល្អសម្រាប់ប្រទេសជាតិទាំងមូល។
លោក ហ៊ុន សែន បានកាន់តំណែងជានាយករដ្ឋមន្ដ្រីជាលើកដំបូងចាប់ពីឆ្នាំ១៩៨៥ ដល់១៩៩១។ ប៉ុន្ដែនៅចន្លោះឆ្នាំ១៩៩៣ និង១៩៩៨ លោកបានកាន់តួនាទីជានាយករដ្ឋមន្ត្រីទី២ ក្នុងរដ្ឋាភិបាលចម្រុះនីតិកាលទី១ ដោយកាលណោះគណបក្សប្រជាជនចាញ់ឆ្នោតតែលោក ហ៊ុន សែន មិនព្រមប្រគល់អំណាចទាំងស្រុងទៅឲ្យគណបក្សរាជានិយមនោះទេ៕
