ក្លឹបអ្នកសារព័ត៌មានអន្ដរជាតិមួយ បានចេញលិខិតថ្កោលទោសរដ្ឋមន្ដ្រីក្រសួងព័ត៌មាន ដោយថា ជាការបំភិតបំភ័យលើអ្នកសារព័ត៌មាន បន្ទាប់ពីរដ្ឋមន្ដ្រីរូបនោះ បានបង្ហោះឯកសារមួយចំនួនលើគណីយហ្វេសប៊ុកផ្ទាល់ខ្លួន។
ក្នុងសេចក្ដីប្រកាសព័ត៌មានចេញផ្សាយនៅថ្ងៃទី២៤ ខែឧសភា ឆ្នាំ២០១៧ ក្លឹបអ្នកសារព័ត៌កម្ពុជានៅក្រៅប្រទេស (Overseas Press Club of Cambodia) បានថ្កោលទោសរដ្ឋមន្ដ្រីក្រសួងព័ត៌មានលោក ខៀវ កាញារីទ្ធ ដោយថា បានគំរាមកំហែងអ្នកសារព័ត៌មានខេមបូឌាដេលីម្នាក់ឈ្មោះ Zsombor Peter ។
បើតាមសេចក្ដីប្រកាស ក្លឹបអ្នកសារព័ត៌កម្ពុជានៅក្រៅប្រទេសអះអាងថា កាលពីល្ងាចថ្ងៃទី២៣ ខែឧសភា ម្សិលមិញ លោក ខៀវ កាញារីទ្ធ បានបង្ហោះលើគណីយហ្វេសប៊ុកផ្ទាល់ខ្លួន នូវលិខិតឆ្លងដែន របស់អ្នកសារព័ត៌មានខេមបូឌាដេលី លោក Zsombor Peter ដោយលោកថែមទាំងបានសរសេរបញ្ជាក់ថា «អ្នកកាសែតទាំងអស់រៀនច្បាប់បោះឆ្នោត និងក្រមសីលធម៌ក្នុងពេលបោះឆ្នោតអោយបានខ្ជាប់ខ្ជួន ចៀសវាងការចោទប្រកាន់នានា»។
ក្លឹបអ្នកសារព័ត៌កម្ពុជានៅក្រៅប្រទេសលើកឡើងទៀតថា ការបង្ហោះលើហ្វេសប៊ុករបស់លោក ខៀវ កាញារីទ្ធ គឺបន្ទាប់ពីមានការចោទប្រកាន់ពីមេឃុំម្នាក់នៅខេត្តរតនគីរី គឺ លោក យួត រម៉ាម ដែលចោទអ្នកសារព័ត៌មានខេមបូឌាដេលីលោក Zsombor Peter រួមទាំងលោក អូន ភាព ថាបានចោទជាសំណួរមិនសមរម្យ និងបំពានច្បាប់របស់គណៈកម្មាធិការជាតិរៀបចំការបោះឆ្នោត។
VOD មិនអាចទាក់ទងសុំការបំភ្លឺពីរដ្ឋមន្ដ្រីក្រសួងព័ត៌មានបានទេ។
អ្នកនាំពាក្យក្រសួងព័ត៌មានលោក អ៊ុក គឹមសេង ប្រាប់វីអូឌីកាលពីល្ងាចម្សិលមិញថា លោកសុំមិនធ្វើអត្ថាធិប្បាយជុំវិញការបង្ហោះលិខិតឆ្លងដែនរបស់អ្នកសារព័ត៌មានខេមបូឌាដេលី ដោយលោក ខៀវ កាញារីទ្ធ នោះទេ។ ប៉ុន្ដែលោកថា ចំពោះការសរសេរលើបណ្ដាញហ្វេសប៊ុករបស់លោក ខៀវ កាញារីទ្ធ នោះ គឺជាការដាស់តឿនមួយ ឲ្យអ្នកសារព័ត៌មានទាំងអស់ បង្កើនការប្រុងប្រយ័ត្នខ្ពស់ប៉ុណ្ណោះ។
ក្លឹបអ្នកសារព័ត៌កម្ពុជានៅក្រៅប្រទេស ចាត់ទុកការបង្ហោះអត្ដសញ្ញាណអ្នកសារព័ត៌មាន លើបណ្ដាញសង្គមដូចនេះថា មិនត្រឹមត្រូវ និងទទូចឲ្យរដ្ឋាភិបាល និងអាជ្ញាធរពាក់ព័ន្ធចាត់វិធានការលុបចោលការបង្ហោះលើបណ្ដាញសង្គមបែបនេះជាបន្ទាន់៕