រដ្ឋាភិបាលកម្ពុជាថាអាជ្ញាធរថៃបានចាប់ខ្លួនជនជាតិខ្មែរដែលចូលទៅកាប់ឈើខុសច្បាប់នៅថៃជាង១០នាក់បន្ថែមទៀត បន្ទាប់ពីចាប់បានជិត២០នាក់កាលពីសប្តាហ៍មុន។
ក្នុងលិខិតចុះថ្ងៃទី២៤ ឧសភា ក្រសួងការបរទេសកម្ពុជាបានឲ្យដឹងថា កាលពីថ្ងៃទី២២ ឧសភា អាជ្ញាធរនៃប្រទេសថៃក្នុងខេត្តសាកែវបានចាប់ឃាត់ខ្លួនប្រជាពលរដ្ឋខ្មែរដែលបានចូលទៅក្នុងប្រទេសនេះកាប់ឈើគ្រញូងចំនួន១៦នាក់ ដែលមានអាយុចាប់ពី១៦ ទៅដល់៥៥ឆ្នាំ ដែលមានស្រុកកំណើតនៅក្នុងខេត្តបាត់ដំបង។
ក្រសួងបានឲ្យដឹងបន្ថែមថាបន្ទាប់ពីឃាត់ខ្លួនរួមជាមួយភស្ភុតាងដែលមានដូចជា រណាយន្ត កាំភ្លើង និងទូរស័ព្ទ យកទៅសាកសួររួច អ្នកទាំង១៦នាក់នោះត្រូវបានបញ្ជូនទៅកាន់ពន្ធនាគារខេត្តសាកែវឃុំខ្លួនបណ្តោះអាសន្ន។ ហើយបើតាមការជូនព័ត៌មានពីអាជ្ញាធរថៃ សំណុំរឿងនេះអាចមានស្ថានទម្ងន់ទោស ដោយសារពាក់ព័ន្ធនឹងការប្រើប្រាស់កាំភ្លើង។
ទោះជាយ៉ាងណានាពេលនេះស្ថានអគ្គកុងស៊ុលខ្មែរ កំពុងធ្វើការជាមួយអាជ្ញាធរថៃដើម្បីរកមេធាវីស្ម័គ្រចិត្តឲ្យជួយការពារពួកគេនៅពេលឡើងតុលាការផងដែរ។
គួររំលឹកថា កាលពីសប្តាហ៍មុន អាជ្ញាធរប្រទេសថៃក៏បានចាប់ខ្លួនពលរដ្ឋខ្មែរចំនួន១៩នាក់ផងដែរ ដែលពាក់ព័ន្ធនឹងការចូលទៅកាប់ឈើខុសច្បាប់នេះ ដែលសរុបទាំងពីរលើកនេះមានប្រជាពលខ្មែរ៣៥នាក់ហើយដែលត្រូវថៃបញ្ជូនទៅតុលាការ៕
