គ.ជ.ប. បានបង្ហាញថា គណបក្សនយោបាយចំនួន ៤ បានឈ្នះអាសនៈនៅក្នុងការបោះឆ្នោតក្រុមប្រឹក្សាឃុំសង្កាត់អាណត្តិទី៤ នៅក្នុងខេត្តកំពង់ចាម ប៉ុន្តែ នាំមុខដោយគណបក្សប្រឆាំង។
លទ្ធផលផ្លូវការនៃការបោះឆ្នោតជ្រើសរើសក្រុមប្រឹក្សាឃុំសង្កាត់ចេញដោយ គ.ជ.ប. នៅថ្ងៃនេះ បង្ហាញថា គណបក្សសង្គ្រោះជាតិ ឈ្នះបានអាសនៈសរុប ៤៣៥ ក្នុងនោះឈ្នះបានតំណែងជាមេឃុំ ៧៤ ជំទប់ទី១ចំនួន ៧២ ជំទប់ទី២ចំនួន ៣៥ និងសមាជិកក្រុមប្រឹក្សាសរុប ២៥៤។
ចំណែកគណបក្សប្រជាជនកម្ពុជាវិញ ឈ្នះបានអាសនៈ ៣៨០ ក្នុងនោះតំណែងជាមេឃុំចំនួន ៣៥ ជំទប់ទី១ ៣៧ ជំទប់ទី២ចំនួន ៧២ និងសមាជិកក្រុមប្រឹក្សាសរុប ២៣៦។
ជាងនេះទៅទៀត គណបក្សខ្មែររួបរួមជាតិរបស់លោក ញឹក ប៊ុនឆៃ និងគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនា ឈ្នះបានមួយអាសនៈរៀងខ្លួន និងជាតំណែងជំទប់ទី២។
លទ្ធផលផ្លូវការនេះ បង្ហាញថា គណបក្សប្រឆាំងឈ្នះបានឃុំសង្កាត់ភាគច្រើននៅក្នុងខេត្តនេះ ជាមួយសំឡេងឆ្នោតគាំទ្រជាង ២៤ម៉ឺន ៥ពាន់សំឡេង ខណៈដែលបក្សកាន់អំណាចទទួលបានការគាំទ្រជាង ២០ម៉ឺន ៥ពាន់សំឡេង៕
