ក្រុមមន្ត្រីបាននិយាយថា ការបំផ្ទុះមួយពីសំណាក់ពួកតាលីបង់ប៉ាគីស្ថាន បានផ្ដាច់ជីវិតមនុស្សយ៉ាងតិច ២៦នាក់ និងបណ្ដាលឲ្យរបួសរាប់សិបនាក់ទៀត នៅក្នុងផ្សារបន្ថែដ៏មមាញឹកមួយ នៅទីក្រុងឡាហ័រ កាលពីថ្ងៃម្សិលមិញនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
AFP បានផ្សាយបន្តថា ការបំផ្ទុះដ៏ខ្លាំងក្លានោះ បានវាយប្រហារផ្លូវសំខាន់មួយខ្សែ ស្ថិតនៅភាគខាងត្បូងទីក្រុងឡាហ័រ ហើយបានបំផ្ទុះបំបែកកញ្ចក់បង្អួចអគារនៅក្បែរៗទីនោះ។ ការស៊ើបអង្កេតបឋមពីសំណាក់ប៉ូលិស បញ្ជាក់ថា វាអាចជាការបំផ្ទុះគ្រាប់បែកអត្តឃាត។
មេប៉ូលិសទីក្រុងឡាហ័រ បាននិយាយថា ការវាយប្រហារនោះ សំដៅទៅរកប៉ូលិស។
មន្ត្រីរដ្ឋបាលប្រចាំទីក្រុងនេះ បានឲ្យដឹងថា ចំនួនអ្នកស្លាប់ចុងក្រោយនេះ កើនឡើង ២៦នាក់ ក្នុងចំណោមអ្នករបួស ៥០នាក់ ប៉ុន្តែ មន្ត្រីសង្គ្រោះបន្ទាន់ប្រចាំទីក្រុងនេះ ប្រាប់ថា អ្នករងរបួសមានចំនួនដល់ទៅ ៦៣នាក់៕
