រថភ្លើងដឹកទំនិញពីរខ្សែ បានបុកគ្នានៅខេត្តព្រះសីហនុ ខណៈដែលនាយកដ្ឋានផ្លូវដែកបន្ទោសថាមកពីក្រុមហ៊ុនទទួលសិទ្ធដឹកជញ្ជូនធ្វើការធ្វេសប្រហែស។
ប្រធាននាយកដ្ឋានផ្លូវដែក លោក ច័ន្ទ សំលេង បានឲ្យវីអូឌីដឹងថា រថភ្លើងពីរខ្សែប្រភេទដឹកទូរកុងតឺន័រ នេះបានបុកគ្នាកាលពីពាក់កណ្តាលយប់មិញនៅក្នុងស្រុកស្ទឹងហាវ ខេត្តព្រះសីហនុ ដែលព័ត៌មានបឋមគឺមិនទាន់ដឹងថាមានអ្នកស្លាប់ ឬរងរបួសនៅឡើយទេ។ លោកមិនអាចបញ្ជាក់បាននៅឡើយទេពីហេតុការណ៍ដែលបណ្តាលឲ្យមានគ្រោះថា្នក់នេះ ដោយសារការគ្រប់គ្រងផ្លូវរថភ្លើងនេះ រដ្ឋាភិបាលបានផ្ទេរឲ្យក្រុមហ៊ុន Royal railway ជាអ្នកគ្រប់គ្រង។ តែលោកបានបន្ទោសក្រុមហ៊ុននេះថាបានធ្វេសប្រហែសក្នុងការចាត់ចែងដឹកជញ្ជូនដែលបានបណ្តាលមានគ្រោះថ្នាក់នេះ។
លោកថា៖ «អត់អីទេចំពោះរថភ្លើងអ្នកដំណើរ។ ព្រោះរឿងនេះច្រើនកើតឡើងតែពេលយប់ ច្រើនរថភ្លើងនុងអានុងសេហ្នឹង វាអត់ឲ្យដំណឹងមុន។ វាត្រូវចេញវាចេញមកបណ្តោយវាដាក់ពេញអីវ៉ាន់ពេញវាចេញមក តែមូលហេតុនោះប្រហែលជាវាអត់គោរពគ្នា តាមខ្ញុំស្មានមើលថាអត់គោរពគ្នាផ្លូវដែលទំនេរហ្នឹង។ ព្រោះយើងមានតែមួយផ្លូវទេពីភ្នំពេញទៅកំពង់សោមហ្នឹង វាអត់គោរពគ្នា អត់ព្រមចាំនៅទីតាំងណាមួយអញ្ចឹងទៅ អាចមានបញ្ហារឿងហ្នឹងបាទ! ឬក៏ងងុយដេកឬក៏អីយើងមិនទាន់ដឹងទេថាយ៉ាងម៉េច»។
ខណៈពេលនេះលោកថានាយកដ្ឋានកំពុងទាក់ទងទៅក្រុមហ៊ុន Royal Railway ដើម្បីសាកសួរពីព័ត៌មានលំអិត និងអ្នកទទួលខុសត្រូវដែលបណ្តាលឲ្យមានគ្រោះថា្នក់នេះហើយ៕
