ទីក្រុងប៉េកាំងបានប្រកាសគម្រោងនៃការបញ្ជូនយានស្រាវជ្រាវនៅភពអង្គារ ដែលតាមគម្រោងបេសកកម្មនឹងចាប់ផ្តើមនៅពាក់កណ្តាលឆ្នាំ២០២០។
ប្រទេសចិនបានប្រកាសពីគម្រោងការស្រាវជ្រាវនេះភ្ជាប់ជាមួយរូបភាពយានអវកាសដែលត្រៀមសម្រាប់ធ្វើដំណើរបានឆ្ងាយនិងមានល្បឿនលឿន។
កម្មវិធីស្រាវជ្រាវបែបវិទ្យាសាស្ត្ររបស់ចិនបានរីកចម្រើនយ៉ាងលឿនតាមមហិច្ឆតារបស់ខ្លួននៅប៉ុន្មានឆ្នាំចុងក្រោយនេះ។ នេះបើតាមសារព័ត៌មាន BBC។
កាលពីថ្ងៃទី១៦ខែសីហា ទីក្រុងប៉េកាំងបានសាកល្បងបច្ចេកទេសទំនាក់ទំនងផ្កាយរណបគឺបញ្ជាក់ថាដំណើរការល្អ។ ផ្កាយរណបនេះឈ្មោះ Jade Rabbit ជាផ្កាយទើបជម្លាក់ចុះនៅដើមខែសីហានេះ ក្រោយពីបញ្ជូនទៅស្រាវជ្រាវនៅភពព្រះចន្ទរយៈពេល៣១ខែ។
រូបភាពដែលផ្សព្វផ្សាយពីក្រុមឧស្សាហកម្មនិងបច្ចេកវិទ្យានៃរដ្ឋបាលរដ្ឋចិនផ្នែកវិទ្យាសាស្ត្រ ដើម្បីការពារសន្តិសុខជាតិបានបង្ហាញពីផ្នែកចំនួន៦នៃផ្កាយរណបដែលគ្រោងបញ្ជូនទៅភពព្រះអង្គារនៅឆ្នាំ២០២០។ រូបនោះ បង្ហាញពីទិដ្ឋភាពនៃការស្រាវជ្រាវនិងរូបនៅលើផែនដី។
គេរំពឹងថាផ្កាយរណបនេះនឹងមានលទ្ធភាពបញ្ជូនទិន្នន័យមកភពផែនដីវិញតាមរយៈមធ្យោបាយមួយចំនួនដែលពួកគេបានរៀបចំទុកជាមុននោះ។
ទោះយ៉ាងណាគេបានបារម្ភថាបច្ចេកទេសរបស់ចិននឹងជួបឧបសគ្គជាច្រើន ដូចជួបបញ្ហាបរាជ័យនៅឆ្នាំ២០១១ ពេលផ្កាយរណបចិនបានចូលទៅដែនអាកាសរបស់រុស្ស៊ី៕
