មេដឹកនាំគណបក្សអំណាចខ្មែរ លោក សួន សេរីរដ្ឋា ត្រូវបានតុលាការសម្រេចផ្ដន្ទាទោសដាក់ពន្ធនាគារ៥ឆ្នាំ ដោយតុលាការចោទថា បានប្រមាថកងទ័ព និងប្រមាថមេដឹកនាំរដ្ឋាភិបាលកម្ពុជា។
ការផ្តន្ទាទោសនេះ ក្រោយពីលោកសរសេរសារបង្ហោះ នៅលើទំព័រហ្វេសប៊ុកថា កូនខ្មែរនិងកងទ័ពជាតិ នឹងស្លាប់នៅក្នុងសមរភូមិយ៉ាងវេទនា ហើយមេទ័ពចោរ នឹងឡើងបុណ្យសក្តិ ប្រមូលបានលុយកាក់ សប្បាយជាមួយស្រីញីយ៉ាងគគ្រឹកគគ្រេង។
នៅក្នុងសវនាការថ្ងៃទី២៥ខែសីហានេះ ចៅក្រម លោក រស់ ពិសិដ្ឋ បានប្រកាសសាលក្រមផ្ដន្ទាទោសលោក សួន សេរីរដ្ឋា ដាក់ពន្ធនាគារ ៥ឆ្នាំ ព្រមទាំងពិន័យជាប្រាក់ ១០លានរៀល ពាក់ព័ន្ធសំណុំរឿងបញ្ចេញមតិលើហ្វេសប៊ុកប្រមាថកងទ័ពកម្ពុជា ជុំវិញជម្លោះព្រំដែនជាមួយឡាវ។
លោក រស់ ពិសិដ្ឋ បញ្ជាក់ថា តុលាការបានកំណត់ពេល១ខែ សម្រាប់ឲ្យមេបក្សអំណាចខ្មែររូបនេះ ប្ដឹងជំទាស់ទៅសាលាឧទ្ធរណ៍។
លោក សុក សំអឿន មេធាវីការពារក្ដីឲ្យលោក សួន សេរីរដ្ឋា យល់ថា តុលាការសម្រេចចោទប្រកាន់និងផ្តន្ទាទោសកូនក្ដីរបស់លោក ជារឿងអយុត្តិធម៌ ខណៈធាតុផ្សំនៃបទល្មើសមិនគ្រប់គ្រាន់ នឹងថាកូនក្តីលោកមិនបានប្រព្រឹត្តខុសដូចការចោទប្រកាន់នោះទេ។
លោកនិយាយថា៖ «ធម្មតាកាលណាសម្រេច វាផ្ទុយពីសេចក្តីសន្និដ្ឋានរបស់ខ្ញុំ យើងវាអត់អស់ចិត្តទេ»។
នៅពេលសួរថា លោកមេធាវី នឹងប្តឹងជំទាស់ទៅសាលាឧទ្ធរណ៍ដែរឬទេ? លោកថាអាស្រ័យលើកូនក្តីនិងក្រុមគ្រួសារ។
ភរិយាលោក សួន សេរីរដ្ឋា អ្នកស្រី ណៃ ចរិយា បានរៀបរាប់ទំាងទឹកភ្នែកថា តុលាការសម្រេចផ្តន្ទាទោសស្វាមីគាត់ ជារឿងអយុត្តិធម៌ ដោយថា អ្នកស្រីនឹងដាក់ពាក់បណ្តឹង ប្តឹងទៅសាលាឧទ្ធរណ៍ ឲ្យជួយរកយុត្តិធម៌ជូនស្វាមីនៅពេលឆាប់ៗខាងមុខនេះ។
អ្នកស្រីនិយាយថា៖ «ប្រជាពលរដ្ឋខ្លាចក្នុងការបញ្ចេញមតិ ម្នាក់ៗប្រហែលជាគាត់លែងហ៊ានបញ្ចេញយោបល់ ព្រោះខ្លាចរដ្ឋាភិបាលចោទប្រកាន់ពីបញ្ហានានា សេរីភាពវាដូចជាត្រូវគេដេរមាត់ជិតចឹង ខ្ញុំអត់ចង់ឲ្យប្រជាធិបតេយ្យនៅក្នុងប្រទេសយើងដើរថយក្រោយទេ ចឹងយើង នឹងធ្វើការតវ៉ារហូតដល់ទីបញ្ចប់»។
កាលពីថ្ងៃ២៤សីហាម្សិលមិញ លោក សួន សេរីរដ្ឋា ពន្យល់ថា ពាក្យ «មេទ័ពចោរ» ដែលលោកសរសេរនោះថា គ្រាន់តែជាការក្រើនរំឮកដល់កងទ័ពឲ្យគោរពវិន័យ និងកុំឲ្យជនជនខិលខូចកេងយកជាប្រយោជន៍ផ្ទាល់ខ្លួន។ លោកថា មិនបានលើកឡើងសំដៅដល់បុគ្គលណាទេ។
ករណីនេះ ប្រធានស្ដីទីគណបក្សអំណាចខ្មែរ លោក សួង សុភ័ណ្ឌ យល់ថា តុលាការសម្រេចផ្តន្ទាទោសលោក សួន សេរីរដ្ឋា គ្មានមូលដ្ឋានគ្រឹះគ្រប់គ្រាន់នោះទេ ដោយលោកថា ទំនងជាធ្វើឡើងក្នុងន័យនយោបាយច្រើនជាង។
លោកនិយាយថា៖ «ខ្ញុំយល់ថា វាមិនមែនជារឿងត្រឹមត្រូវទេ ហើយយើងទទូចហើយ ទទូចទៀត រឿងរបស់លោក សួន សេរីរដ្ឋា មិនខុសពីរឿងរបស់លោក ហ៊ុន សែន របស់លោក វង សូត្រ និងរបស់លោក ទៀ បាញ់ ទេ ដែលបានមើលងាយប្រជាពលរដ្ឋខ្មែរ ហើយពាក់ព័ន្ធនឹងការចោទប្រកាន់ ញុះញ៉ង់ផ្សេងៗ ដូចខ្ញុំជម្រាបចឹង វាគ្មានព្យៈសនកម្មឯណា ក្រោយពីអ្វីដែលលោក សួន សេរីរដ្ឋា លើកឡើងទេ តុលាការ គួរតែទម្លាក់ចំណាត់ការនេះចោល តែផ្ទុយទៅវិញ ខ្ញុំមើលឃើញថាហាក់បីដូចជារង់ចំាអ្នកណាម្នាក់ផ្តល់ចម្លើយជាវិជ្ជមានមួយដល់តុលាការ តែទោះបីយ៉ាងណាក៏ដោយ ខ្ញុំសង្ឃឹមយ៉ាងមុតមំាថា គួរតែលើកលែងការចោទប្រកាន់នៅពេលដែលប្តឹងតវ៉ានៅសាលាឧទ្ធរណ៍»។
គួរបញ្ជាក់ថាកាលពីថ្ងៃទី១៣សីហាឆ្នាំ២០១៧នេះ លោក សួន សេរីរដ្ឋា ត្រូវបានអាជ្ញាធរចាប់ខ្លួនត្រង់ចំណុចស្ពានព្រែកព្នៅ រាជធានីភ្នំពេញ បន្ទាប់ពីលោកបានសរសេរបង្ហោះលើហ្វេសប៊ុកប្រមាថកងទ័ព។
បន្ថែមលើសនេះ ក្នុងពិធិចែកសញ្ញាបត្រមួយ កាលពីពេលកន្លងទៅ លោកនាយករដ្ឋមន្ដ្រី ហ៊ុន សែន បានព្រមានរំលាយគណបក្សនេះចោល ដោយចោទមួយកណីទៀតថា ប្រធានគណបក្សរូបនេះ បានប្រមាថព្រះមហាក្សត្រខ្មែរ។ ប៉ុន្តែលោក សួង សុភ័ណ្ឌ អះអាងថា មិនអាចរំលាយគណបក្សនេះបានទេ៕