អ្នកនាំពាក្យក្រសួងការបរទេសកម្ពុជា បានឲ្យដឹងថា អាជ្ញាធរវៀតណាម បានឃាត់ខ្លួនពលរដ្ឋកម្ពុជា ២៦នាក់ ក្នុងនោះមានកុមារ ១៩នាក់ ដែលបានឆ្លងដែនខុសច្បាប់ចូលប្រទេសវៀតណាម។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានថ្លែងក្នុងសេចក្ដីប្រកាសព័ត៌មានកាលពីថ្ងៃទី២៣ ខែកញ្ញាថា ពលរដ្ឋខ្មែរទាំង ២៦នាក់នោះ នឹងត្រូវអាជ្ញាធរវៀតណាមបញ្ជូនត្រឡប់មកប្រទេសកម្ពុជាវិញ នៅថ្ងៃទី២៧ ខែកញ្ញា បន្ទាប់ពីពួកគេត្រូវបានឃាត់ខ្លួន ដោយសារបានឆ្លងដែនទៅសុំទាន និងលក់ឆ្នោតខុសច្បាប់ នៅទីក្រុងហូជីមិញ។
អ្នកនាំពាក្យរូបនេះ បានបញ្ជាក់ថា គិតត្រឹមខែកញ្ញា ឆ្នាំ២០១៦នេះ ពលរដ្ឋកម្ពុជាសរុប ១៦៨នាក់ ត្រូវបានអាជ្ញាធរវៀតណាមឃាត់ខ្លួន និងបញ្ជូនត្រឡប់មកវិញ បន្ទាប់ពីពួកគេឆ្លងដែនខុសច្បាប់ ទៅសុំទាន និងលក់ឆ្នោតនៅទីនោះ៕
