គណបក្សសង្គ្រោះជាតិនៅព្រឹកថ្ងៃចន្ទនេះប្រកាសថា គណបក្សនេះនឹងចាប់ផ្តើមធ្វើយុទ្ធនាការលើកបដាជារូបភាព នៅតាមទីស្នាក់ការបក្សទូទំាងប្រទេស ដើម្បីទាមទារឲ្យដោះលែងលោក កឹម សុខា ដោយគ្មានលក្ខខណ្ឌ។
ក្នុងសន្និសីទសារព័ត៌មាននៅថ្ងៃទី២៥ ខែកញ្ញានេះ តំណាងរាស្ត្រគណបក្សសង្គ្រោះជាតិ លោក សុន ឆ័យ បានថ្លែងថា ផ្ទំាងបដា ដោយមានរូបលោក កឹម សុខា រួមជាមួយសារទាមទារឲ្យមានការដោះលែង នឹងត្រូវដាក់តាំង និងផ្សព្វផ្សាយ នៅតាមទីស្នាក់ការគណបក្សនេះ ទូទាំងប្រទេស ដើម្បីជម្រុញឲ្យមានយុត្តិធម៌ ដល់ប្រធានបក្សសង្គ្រោះជាតិ លោក កឹម សុខា។
លោកមានប្រសាសន៍ថា៖ «គណបក្សយើង [សង្គ្រោះជាតិ] នឹងដាក់ [បដារូបភាព] នៅតាមទីស្នាក់ការគណបក្សនៅគ្រប់ខេត្តរាជធានីទាំងអស់។ យើង នឹងពិនិត្យមើលភាពជាក់ស្តែងទៀតថាតើ ការតស៊ូមតិរបស់យើងធ្លាក់ទៅដល់តាមស្រុកតាមអីយ៉ាងណានោះ…កាលណាមានការទទួលរងគ្រោះដោយអយុត្តិធម៌ ប្រតិកម្មជាធម្មជាតិវាចេញមក ដើម្បីតស៊ូឲ្យមានការត្រួតពិនិត្យ ទៅលើភាពអវិជ្ជមានដែលកើតមានហ្នឹង»។
លោក សុន ឆ័យ ឲ្យដឹងបន្តថា គណបក្ស មិនមានការបារម្ភចំពោះការលើកបដានោះទេ ដោយថា ដរាបតុលាការ មិនទាន់សម្រេចថា លោក កឹម សុខា មានទោស នោះការតស៊ូមតិ ដើម្បីទាមទារឲ្យមានការដោះលែង គឺមិនខុសច្បាប់នោះទេ។
អ្នកនាំពាក្យក្រសួងមហាផ្ទៃ លោក ខៀវ សុភ័គ ហៅការលើកបដាទាមទារនេះ ពុំមានឥទ្ធិពលអ្វី ទៅលើការសម្រេចចិត្តរបស់តុលាការនោះទេ។
ករណីនេះ លោក លោក ខៀវ សុភ័គ ហាក់យល់ផ្ទុយវិញ ដោយថា ការលើកបដាទាមទារនេះ មានចេតនាបង្កើតឲ្យមានបដិវត្តន៍ពណ៌ច្រើនជាង ដោយលោក ក៏ព្រមានដោយមិនចំឈ្មោះថា អាចនឹងមានការចាប់ខ្លួនអ្នកផ្តួចផ្តើមឲ្យមានយុទ្ធនាការនេះ។
លោកថា៖ «យើងចាំមើលថា នណារជាអ្នកបញ្ជារឲ្យធ្វើ ប្រជុំព្រឹកមិញ យើងដឹងហើយអ្នកណាជាអ្នកបញ្ជារ គឺអ្នកហ្នឹងឯងជាអ្នកទទួលខុសត្រូវ។ ប្រហែលជាអ្នកហ្នឹង ដែលផ្តើមធ្វើបដិវត្តន៍ពណ៌។ អ្នកបញ្ជាទេ ដែលសំខាន់! អ្នកបញ្ជារឲ្យធ្វើនៅក្នុងគណបក្សសង្គ្រោះជាតិនោះណា ហើយយើងដឹងអ្នកហ្នឹងហើយ! មិនបាច់លើកឈ្មោះមកអីទេ! យកមកដល់ផ្ទះនោះ។ ពិបាកអីៗ អ្នកណាបញ្ជារយើងដឹងតើ ហើយគ្នាគាត់ហ្នឹងអ្នកប្រាប់ អ្នកណាបញ្ជាឲ្យលើកបដា អ្នកណាបញ្ជាជាអ្នកហ្នឹង»។
លោក កឹម សុខា ដែលពេលនេះ កំពុងត្រូវបានឃុំខ្លួននៅពន្ធនាគារត្រពាំងផ្លុង ក្នុងខេត្តត្បូងឃ្មុំ ត្រូវបានចាប់ខ្លួន ទាំងមានអភ័យឯកសិទ្ធិសភា កាលពីរំលងអធ្រាត្រ ថ្ងៃទី៣ខែកញ្ញា ដោយចោទថា ពីបទក្បត់ជាតិដោយរដ្ឋាភិបាលកម្ពុជា។
ក្រោយចាប់ខ្លួនមេបក្សប្រឆំាងលោក កឹម សុខា តំណាងអង្គការសហប្រជាជាតិ និងស្ថានទូតធំៗរួមមាន អង់គ្លេស អូស្ត្រាលី អាមេរិក និងសហភាពអឺរ៉ុបនិងប្រទេសមួយចំនួនទៀត បានសម្តែងការព្រួយបារម្ភជាខ្លាំង ជុំវិញការចាប់ខ្លួនមេបក្សរូបនោះ ហើយពួកគេ ជំរុញឲ្យរដ្ឋាភិបាលកម្ពុជា បញ្ឈប់ការគំរាមកំហែងលើគណបក្សប្រឆាំង។ ប៉ុន្តែប្រទេសកុម្មុយនីស្តចិនបានគាំទ្រចំណាត់ការនេះ៕
