សេចក្ដីរាយការណ៍បានឲ្យដឹងថា ប្រទេសម៉ាឡេស៊ី កាលពីថ្ងៃម្សិលមិញនេះ បានប្រកាសថា ប្រទេសនេះមិនចូលរួមក្នុងសេចក្ដីថ្លែងការណ៍មួយដែលចេញដោយសមាគមអាស៊ាន ស្ដីពីស្ថានការណ៍នៅរដ្ឋរ៉ាក់ឃីន ប្រទេសភូមានោះទេ។
សារព័ត៌មានសិង្ហបុរី Channel News Asia បានរាយការណ៍ថា សេចក្ដីថ្លែងការណ៍របស់ប្រធានសមាគមអាស៊ាន ដែលចេញកាលពីថ្ងៃអាទិត្យម្សិលមិញនៅក្រៅកិច្ចប្រជុំនៃមហាសន្និបាតអង្គការសហប្រជាជាតិនៅទីក្រុងញូវយ៉កនោះ បានបង្ហាញនូវកង្វល់របស់ក្រុមរដ្ឋមន្ត្រីការបរទេសអាស៊ាន ជុំវិញស្ថានការណ៍វវិត្តន៍នៅភាគខាងជើងរដ្ឋរ៉ាក់ឃីន នៅក្នុងប្រទេសភូមា។
សេចក្ដីថ្លែងការណ៍នោះ បានថ្កោលទោសចំពោះការវាយប្រហារកាលពីថ្ងៃទី២៥ ខែសីហា ទៅលើកងសន្តិសុខភូមា ព្រមទាំងសកម្មភាពហិង្សាទាំងអស់ ដែលបង្កឲ្យជនស៊ីវិលបាត់បង់ជីវិត ការបំផ្លិចបំផ្លាញផ្ទះសម្បែង និងការរត់ភៀសខ្លួនមនុស្សរាប់ម៉ឺននាក់។
ទោះជាយ៉ាងណា រដ្ឋមន្ត្រីការបរទេសម៉ាឡេស៊ី លោក អានីហ្វាហ៍ អាម៉ាន់ បាននិយាយនៅក្នុងសេចក្ដីថ្លែងការណ៍ដាច់ដោយឡែកមួយកាលពីថ្ងៃម្សិលមិញថា ប្រទេសម៉ាឡេស៊ីយល់ថា សេចក្ដីថ្លែងការណ៍របស់អាស៊ាននោះ មិនឆ្លុះបញ្ចាំងពីស្ថានការណ៍ជាក់ស្ដែងនោះឡើយ។
ប្រមុខកាទូតម៉ាឡេស៊ីរូបនេះ បានលើកឡើងថា សេចក្ដីថ្លែងការណ៍នោះក៏បានលុបចោលផងដែរនូវពាក្យជនជាតិរ៉ូហ៊ីងយ៉ា ក្នុងឋានៈជាសហគមន៍រងគ្រោះ។
លោកបន្ថែមថា ខណៈដែលម៉ាឡេស៊ីថ្កោលទោសអំពើហិង្សាថ្ងៃទី២៥ ខែសីហា ប៉ុន្តែ ម៉ាឡេស៊ីយល់ថា ប្រតិបត្តិការបោសសម្អាតធ្វើឡើងដោយអាជ្ញាធរភូមានោះ មានលក្ខណៈមិនសមរម្យនោះឡើយ ហើយថា ប្រតិបត្តិការរបស់អាជ្ញាធរភូមាបាននាំទៅរកការស្លាប់ជនស៊ីវិលស្លូតត្រង់ និងបណ្ដាលឲ្យជនជាតិរ៉ូហ៊ីងយ៉ាជាង ៤សែននាក់រត់ភៀសខ្លួន។
លោក អានីហ្វាហ៍ និយាយថា ម៉ាឡេស៊ី មានក្ដីបារម្ភអំពីសេចក្ដីថ្លែងការណ៍របស់អាស៊ាន ប៉ុន្តែ លោកថា ក្ដីកង្វល់របស់អាស៊ាន មិនត្រូវបានឆ្លុះបញ្ចាំងឲ្យឃើញនោះឡើយ។ លោកថា ហេតុនេះ សេចក្ដីថ្លែងការណ៍របស់ប្រធានអាស៊ាន មិនផ្អែកលើសំឡេងរួមនោះទេ៕
