អធិកាបតីអាល្លឺម៉ង់អ្នកស្រី អែនជឺឡា មឺគែល បានទទួលជោគជ័យសម្រាប់ការបោះឆ្នោតអាណត្តិទី៤ កាលពីថ្ងៃម្សិលមិញនេះ ប៉ុន្តែ ជ័យជម្នះរបស់អ្នកស្រី សម្បូរទៅដោយសមាជិកសភាស្ដាំនិយមជ្រុល ដែលជាកម្លាំងជាតិនិយមថ្មី គិតចាប់តាំងពីក្រោយសង្គ្រាមលោកលើកទី២មក។ នេះដោយយោងតាមការផ្សាយរបស់ទីភ្នាក់ងារព័ត៌មាន AFP។
ផ្អែកតាមលទ្ធផលនៃការបោះឆ្នោត អ្នកស្រី មឺគែល ដែលបានកាន់អំណាចអស់រយៈពេល ១២ឆ្នាំមកហើយនោះ ទទួលបានសំឡេងគាំទ្រប្រហែល ៣៣ភាគរយ សម្រាប់គណបក្សសហភាពគ្រីស្ទានរបស់អ្នកស្រី។
ចំណែកឯគូប្រជែងរបស់អ្នកស្រី គឺគណបក្សប្រជាធិបតេយ្យសង្គម និងបេក្ខជន លោក Martin Schulz បានទទួលសំឡេងគាំទ្រយ៉ាងប្រកៀកប្រកិតជាមួយអ្នកស្រី មឺគែល។
ប៉ុន្តែ សម្រាប់ក្រុមដែលប្រឆាំងនឹងពួកឥស្លាម ប្រឆាំងនឹងចលនាអន្តោប្រវេសន៍ ឬគណបក្ស AFD វិញ ប្រមូលបានសំឡេងគាំទ្រប្រហែល ១៣ភាគរយ ដែលធ្វើឲ្យគណបក្សនេះក្លាយជាកម្លាំងនយោបាយធំលំដាប់ទី៣ នៅក្នុងប្រទេសអាល្លឺម៉ង់។
សម្រាប់ជោគជ័យរបស់គណបក្ស AFD នេះ ក្រុមអ្នកអត្ថាធិប្បាយនានា បានហៅជោគជ័យរបស់បក្សនេះថាជា «ផ្ទាំងរលក» នៅក្នុងប្រវត្តិសាស្ត្រសាធារណរដ្ឋអាល្លឺម៉ង់។ ចំណែកកាសែត Bild ដែលជាសារព័ត៌មានធំបំផុតរបស់អាល្លឺម៉ង់ បានហៅជ័យជម្នះរបស់បក្សនេះថា «ការញ័ររញ្ជួយនៅក្នុងនយោបាយ»។
ក្រុមអ្នកគាំទ្របក្សនេះ បានប្រមូលផ្ដុំគ្នានៅទីស្នាក់ការបក្សនៅទីក្រុងប៊ែរឡាំង ស្រែកហ៊ោអបអរដោយក្ដីរីករាយ ខណៈដែលទូរទស្សរន៍បានរាយការណ៍អំពីលទ្ធផលនៃការបោះឆ្នោត។
គណបក្សជាតិនិយមមួយនេះដែលទើបតែមានអាយុ ៤ឆ្នាំ និងមានទំនាក់ទំនងជាមួយគណបក្សស្ដាំនិយម ឬគណបក្សចរណសិរ្សជាតិបារាំង នៅក្នុងប្រទេសបារាំង និងគណបក្ស UKIP របស់អង់គ្លេសនោះ មិនសូវទទួលបានការចាប់អារម្មណ៍ពីប្រព័ន្ធផ្សព្វផ្សាយអាល្លឺម៉ង់ទេ ប៉ុន្តែ គណបក្សនេះនៅតែអាចកសាងមូលដ្ឋានគាំទ្ររបស់ខ្លួនយ៉ាងខ្លាំងក្លា នៅតំបន់ដែលជាអតីតអាល្លឺម៉ង់ខាងកើត ឬអតីតរដ្ឋកុម្មុយនីស្ដ៕
