រដ្ឋាភិបាលយោធាថៃ កំពុងតែជំរុញទៅមុខនូវច្បាប់ជាច្រើន ដើម្បីពង្រឹងសន្តិសុខតាមប្រព័ន្ធអ៊ិនធឺណិត ប៉ុន្តែ ក្រុមអ្នករិះគន់និយាយថា ការសម្រេចបែបនេះ អាចបណ្ដាលឲ្យមានការឃ្លាំមើលតាមប្រព័ន្ធអ៊ិនធឺណិតកាន់តែខ្លាំង បង្កជាក្ដីបារម្ភចំពោះភាពឯកជនរបស់បុគ្គលម្នាក់ៗ។ នេះដោយយោងតាមការផ្សាយរបស់ទីភ្នាក់ងារព័ត៌មាន Reuters។
កិច្ចប្រជុំសភាជាសាធារណៈកាលពីថ្ងៃពុធកន្លងមកនេះ ទៅលើការធ្វើវិសោធនកម្មច្បាប់បទឧក្រិដ្ឋកម្មកុំព្យូទ័រ បានទទួលប្រតិកម្មចម្រុះ។ មនុស្សមួយចំនួន បានបង្ហាញក្ដីបារម្ភជុំវិញការកំណត់និយមន័យមិនច្បាស់នៃច្បាប់នេះ ជុំវិញអ្វីគេកំណត់ថាជា “ព័ត៌មានខុសឆ្គង” ដោយសារតែវាត្រូវបានគេប្រើប្រាស់រួមគ្នាជាមួយនឹងបណ្ដឹងឧក្រិដ្ឋ និងបណ្ដឹងបរិហារកេរ្តិ៍ព្រះមហាក្សត្រ។
ត្រូវបានដាក់ឲ្យប្រើប្រាស់ដំបូងកាលពីឆ្នាំ២០០៧ ច្បាប់ឧក្រិដ្ឋកម្មកុំព្យូទ័រ ត្រូវបានតាក់តែងឡើងដើម្បីការពារមនុស្សប្រឆាំងនឹងមេរោគតាមអ៊ិនធឺណិត ការលួចចូលយក និងចម្លងទិន្នន័យ ដោយដាក់ទោសទៅលើជនប្រព្រឹត្តឲ្យជាប់ពន្ធនាគាររហូតដល់ ៥ឆ្នាំ និងពិន័យជាប្រាក់ដល់ទៅ ១សែនបាត។ ទោះជាយ៉ាងណា ប៉ុន្មានឆ្នាំមកនេះ ច្បាប់នេះរងការរិះគន់ថា វាត្រូវបានរដ្ឋ និងអ្នកដទៃទៀត ប្រើប្រាស់ធ្វើជាឧបករណ៍គំរាមកំហែងតាមផ្លូវច្បាប់ នៅក្នុងបណ្ដឹងបរិហាកេរ្តិ៍។
ប៉ុន្តែ ប្រធានកិច្ចប្រជុំ លោក ឆាតឆាវ៉ាន់ សុកស៊ុំកិត បាននិយាយថា គណៈកម្មាធិការចង់សម្របសម្រួលគ្រប់គណបក្សនយោបាយ ហើយច្បាប់ថ្មី គួរតែមានលក្ខណៈអាចការពារសិទ្ធិអ្នកប្រើប្រាស់អ៊ិនធឺណិត និងមិនផ្ដល់អំណាចលើសលប់ដល់អាជ្ញាធរស៊ើបអង្កេតនោះឡើយ៕