ប្រធានស្ដីទីបក្សប្រឆាំង លោក កឹម សុខា នៅព្រឹកថ្ងៃនេះ បានលើកឡើងថា បើមិនអាចជួយសម្រួលប្រជាពលរដ្ឋរាប់លាននាក់ ឲ្យចុះឈ្មោះបោះឆ្នោតបានទេ លោកមិនអាចវាយតម្លៃបានថា ការរៀបចំចុះឈ្មោះបោះឆ្នោតដើម្បីរៀបចំបញ្ជីបោះឆ្នោតថ្មីនេះ ល្អប្រសើរ ឬជោគជ័យនោះឡើយ។
នៅលើទំព័រហ្វេសប៊ុករបស់លោក លោក កឹម សុខា ដែលកំពុងស្នាក់នៅក្នុងទីស្នាក់ការបក្សអស់រយៈពេលជាច្រើនខែមកហើយនោះ បានអំពាវនាវទៅភាគីពាក់ព័ន្ធនានា ឲ្យពិចារណាឡើងវិញ ចំពោះដំណើរការនៃការចុះឈ្មោះបោះឆ្នោតនេះ។
មេដឹកនាំបក្សប្រឆាំងរូបនេះ បានលើកឡើងដូច្នេះ បន្ទាប់ពីមើលឃើញថា ការចុះបញ្ជីប្រជាពលរដ្ឋក្នុងបញ្ជីបោះឆ្នោតថ្មី ហាក់មិនអាចសម្រេចដូចការគ្រោងទុករបស់ គ.ជ.ប. នោះឡើយ ដោយសារចំនួនពលរដ្ឋបានទៅចុះឈ្មោះបោះឆ្នោត ទើបតែសម្រេចប្រហែល ៨០ភាគរយប៉ុណ្ណោះ ខណៈដែលរយៈពេលនៃការចុះឈ្មោះបោះឆ្នោត នៅសល់ត្រឹមតែ ៥ថ្ងៃទៀតប៉ុណ្ណោះ៕
