អភិបាលរាជធានីភ្នំពេញ លោក ប៉ា សុជាតិវង្ស បានក្រើនរំលឹកដល់ម្ចាស់អាជីវកម្មផ្គត់ផ្គង់បេតុងលាយទាំងអស់ ឲ្យគោរពតាមសេចក្ដីណែនាំរបស់អាជ្ញាធរ ចំពោះការដឹកជញ្ជូន និងបញ្ឈររថយន្តលាយបេតុងនៅក្នុងទីក្រុងមួយនេះ។
ក្នុងសេចក្ដីប្រកាសកាលពីថ្ងៃម្សិលមិញនេះ លោក ប៉ា សុជាតិវង្ស បានរំលឹកឡើងវិញថា ដើម្បីរក្សាសណ្ដាប់ធ្នាប់ របៀបរៀបរយសាធារណៈ និងកាត់បន្ថយការកកស្ទះចរាចរណ៍នៅក្នុងទីក្រុង សាលារាជធានីមិនអនុញ្ញាតឲ្យចូលរាជធានីភ្នំពេញពេលព្រឹកចាប់ពីម៉ោង ៦ ដល់ម៉ោង ៩ និងពេលល្ងាចចាប់ពីម៉ោង ៤ រហូតដល់ម៉ោង ៧យប់។
អភិបាលរាជធានីភ្នំពេញ បានក្រើនរំលឹកដូច្នេះ បន្ទាប់ពីសាលារាជធានីភ្នំពេញ សង្កេតឃើញមានរថយន្តដឹកជញ្ជូនបេតុងលាយស្រាប់ បានចរាចរ និងបញ្ឈររថយន្តបាញ់បេតុងបន្តកន្ទុយគ្នានៅតាមដងផ្លូវ ដែលអាជ្ញាធរថា បានបណ្ដាលឲ្យប៉ះពាល់ដល់សណ្ដាប់ធ្នាប់សាធារណៈ និងបង្កការកកស្ទះចរាចរណ៍៕