ក្រុមមេដឹកនាំសហជីព និងសកម្មជនការពារសិទ្ធិកម្មករ បានលើកឡើងថា សេរីភាពនៃបញ្ចេញមតិកាន់តែរួមតូច បន្ទាប់ពីអតីតមេដឹកនាំសហជីពម្នាក់រងបណ្តឹងពីសំណាក់ក្រុមសហជីពមានទំនោរគំាទ្ររដ្ឋាភិបាល។
អតីតប្រធានសហជីពសេរីកម្មករកម្ពុជាលោក ជា មុន្នី ត្រូវបានក្រុមសហជីពដែលគេមើលឃើញថាមានទំនោរគាំទ្ររដ្ឋាភិបាលនោះ ដាក់ពាក្យប្តឹងកាលពីថ្ងៃទី១៨ ខែធ្នូ ដោយចោទថា ញុះញង់ឱ្យសហគមន៍អឺរ៉ុប និងសហរដ្ឋអាមេរិក ដាក់ទណ្ឌកម្មសេដ្ឋកិច្ចលើកម្ពុជា ក្រោយការរំលាយបក្សប្រឆាំង។
លោក ជា មុន្នី ប្អូនប្រុសមេដឹកនាំសហជីពលោក ជា វិជ្ជា ដែលត្រូវបានបាញ់សម្លាប់កាលពីខែមករាឆ្នាំ២០០៤នោះ ត្រូវបានតុលាការរាជធានីភ្នំពេញ កោះហៅឲ្យចូលបំភ្លឺនៅខែមករាឆ្នាំក្រោយ ទៅតាមបណ្ដឹងពីសហជីព ១២០។
អនុប្រធានសម្ព័នសហជីពប្រជាធិបតេយ្យកម្មករកាត់ដេរកម្ពុជា ហៅកាត់ថា ស៊ីខាវឌូ លោក គង់ អាទិត្យ បានបង្ហាញពីក្ដីបារម្ភពីសុវត្ថិភាព និងសេរីភាពបញ្ចេញមតិរួមតូច ខណៈដែលស្ថានការណ៍នយោបាយកម្ពុជា ស្ថិតក្នុងស្ថានភាពមិនច្បាស់លាស់ផងដែរ។
លោកមានប្រសាសន៍ថា៖ «វាមានលក្ខណៈចង្អៀត[សិទ្ធិសេរីភាព]ជាងមុនបន្តិច ប្រសិនបើមើលទៅ ព្រោះខាងរដ្ឋាភិបាលប្រយ័ត្នប្រយ៉ែងពីរឿងការងារ ដែលទាក់ទងនឹងបញ្ហានយោបាយខ្លះដែរ។ វាពិបាកជាងមុន ពិបាកក្នុងការចុះទៅចងក្រង ពិបាកក្នុងការ តវ៉ាជាសាធារណៈផ្សេងៗ។ យើងមិនសូវធ្វើបានទេមួយរយៈហ្នឹងមក ដោយសារស្ថានភាពនយោបាយតឹងតែង»។
ទោះជាបែបនេះក្តី លោក គង់ អាទិត្យ បានអះអាងថា ពួកគេនៅតែសហការជាមួយរដ្ឋាភិបាល និងស្ថាប័នពាក់ព័ន្ធរបស់រដ្ឋ ដើម្បីធ្វើកិច្ចការរបស់ខ្លួនប្រកបដោយតម្លាភាព សុចរិតភាព ដោយថា ដើម្បីជួយទាមទារ និងការពារសិទ្ធិកម្មករ ឲ្យស្របតាមច្បាប់ជាតិ និងច្បាប់អន្តរជាតិ។
នាយកប្រតិបត្តិនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល លោក មឿន តុលា យល់ថា លោក ជា មុន្នី មិនមានឥទ្ធិពលធ្វើឲ្យសហគមន៍អឺរ៉ុប និងអាមេរិក សម្រេចដាក់ទណ្ឌកម្មសេដ្ឋកិច្ចប្រឆាំងនឹងកម្ពុជានោះទេ។ ផ្ទុយទៅវិញ លោកចាត់ទុកបណ្ដឹងប្រឆាំងនឹងលោក ជា មុន្នីថា ត្រូវបានធ្វើឡើងដោយចេតនានយោបាយច្រើនជាង។
លោកយល់ថា៖ «អ្វីដែលសហគម៍អឺរ៉ុបកន្លងមកមិនមែនរឿងលោក ជា មុន្នី លើកឡើងទេ អ្វីដែលសហគមន៍អឺរ៉ុប និងអាមេរិកលើកឡើងកន្លងមក គឺពាក់ព័ន្ធនឹងការរំលាយគណបក្សសង្គ្រោះជាតិ ពាក់ព័ន្ធការដកសិទ្ធិនយោបាយអ្នកនយោបាយចំនួន ១១៨នាក់ ពាក់ព័ន្ធនឹងការធ្វើទុក្ខបុកម្នេញទៅលើអង្គការសង្គមស៊ីវិល និងប្រព័ន្ធផ្សព្វផ្សាយឯករាជ្យ។ យើងគួរតែដាក់ថ្នាំឲ្យវាចំនឹងជំងឺ យើង…ឈឺក្បាល ហើយយើងចេះតែលេបថ្នាំក្រហម…វាអត់បាត់ទេ»។
ទាំងលោក មឿន តុលា និងលោក គង់ អាទិត្យ បានលើកឡើងប្រហាក់ប្រហែលគ្នាថា ដំណាក់កាលនេះ អ្នកនយោបាយត្រូវយកបញ្ហាប្រឈមដាក់លើតុជជែកគ្នា ដើម្បីរកដំណោះស្រាយ ដោយថា បើពុំដូច្នោះទេ អ្នកដែលរងគ្រោះ គឺប្រជាពលរដ្ឋ និងក្រុមកម្មករ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បានជំរុញទៅក្រុមមេដឹកនាំសហជីពទាំងអស់ ឲ្យរួមកម្លាំងគ្នាលើកកម្ពស់សិទ្ធិកម្មករ និងបង្ការការបាក់បែកនៅក្នុងសង្គមកម្ពុជា ខណៈដែលកម្ពុជាស្ថិតក្នុងស្ថានភាពប្រឈមនឹងការដាក់ទណ្ឌកម្មពីសហគមន៍អន្តរជាតិនោះ។
លោក យង់ គិមអេង ប្រាប់ថា៖ «កាលណាយើងមានការប្តឹងផ្តល់គ្នា មិនមែនប៉ះពាល់តែមនុស្សតែម្នាក់ទេ ព្រោះប្តឹងមនុស្សម្នាក់ ប៉ះពាល់ដល់ក្រុមគ្រួសារសាច់ញាតិគាត់ ដែលអត់សប្បាយចិត្តដែរ យូរៗច្រើនទៅៗ វាធ្វើឲ្យការមិនសប្បាយចិត្ត កាន់តែច្រើន ហើយការសាមគ្គីភាពនៅក្នុងសង្គម ក្នុងសហគមន៍យើង វាអាចមានការបែកបាក់គ្នា»។
ក្រុមមេដឹកនាំសហជីព ១២០ស្ថាប័ន ក្នុងនោះមានទាំងមេដឹកនាំសហជីពកម្ពុជា លោក ជួន មុំថុល ដែលមានតួនាទីជាទីប្រឹក្សាអមក្រសួងការងារផងនោះ បានដាក់ពាក្យប្ដឹងលោក ជា មុន្នី កាលពីថ្ងៃទី១៨ ខែធ្នូ ដោយចោទលោក ជា មុន្នី ថា បាន«ញុះញង់»ឲ្យសហភាពអឺរ៉ុប និងអាមេរិកផ្អាកប្រព័ន្ធអនុគ្រោះពន្ធសម្រាប់ទំនិញនាំចូលពីកម្ពុជា។
បណ្ដឹងនោះ បានកើតឡើងបន្ទាប់ពីលោក ជា មុន្នី និយាយនៅក្នុងវិទ្យុអាស៊ីសេរីកាលពីថ្ងៃទី១៥ ខែធ្នូ ដែលក្រុមសហជីពចាត់ទុកជា «ការញុះញង់»។
ក្រោយរងបណ្តឹងនេះ អតីតប្រធានសហជីពសេរីកម្មករកម្ពុជា លោក ជា មុន្នី មានប្រសាសន៍ថា លោកមិនខ្វល់ទៅនឹងការប្តឹងនេះទេ ហើយឆ្លើយថា លោកស្វាគមន៍ចំពោះការប្តឹងនោះ៕