ហ្វេសប៊ុករបស់លោកនាយករដ្ឋមន្ត្រី ហ៊ុន សែន បានសរសេរថា លោកនាយករដ្ឋមន្ត្រីនិងភរិយារបស់លោក មានព្រហ្មវិហារធម៌ជួយផ្តល់សេចក្តីសុខដល់ប្រជាពលរដ្ឋខ្មែរគ្រប់ៗរូប។
លោកនាយរដ្ឋមន្ត្រី ហ៊ុន សែន គិតត្រឹមថ្ងៃទី១៤ ខែមករា ឆ្នាំ២០១៧ លោកកាន់តំណែងជានាយករដ្ឋមន្ត្រីបាន៣២ឆ្នាំហើយ បើគិតទាំងលោកកាន់តំណែងជារដ្ឋមន្ត្រីក្រសួងការបរទេសផង លោកកាន់តំណែងក្នុងជួរថ្នាក់ដឹកនាំបាន៣៨ឆ្នាំ។ លោកជាមេដឹកនាំដែលកាន់អំណាចយូរជាងគេនៅតំបន់អាស៊ាននិងកាន់អំណាចយូរលំដាប់លេខ៧លើពិភពលោក។
ចំណែកភរិយារបស់លោកនាយករដ្ឋមន្ត្រី គឺលោកស្រី ប៊ុន រ៉ានី បច្ចុប្បន្នមានតួនាទីជាប្រធានកាកបាតក្រហមកម្ពុជា។
នៅលើហ្វេសប៊ុករបស់លោកនាយករដ្ឋមន្ត្រីហ៊ុន សែន សរសេរថា រូបលោកនិងភរិយាបានផ្តល់ភាពកក់ក្តៅ និងសេចក្តីសុខឲ្យប្រជាពលរដ្ឋកម្ពុជាគ្រប់ៗរូប។ ហ្វេសប៊ុកសរសេរថា៖ «ព្រហ្មវិហារធម៌ និងសេចក្តីគោរពស្រឡាញ់ដ៏ជ្រាលជ្រៅរបស់ សម្តេចទាំងទ្វេ គឺបានផ្តល់នូវភាពកក់ក្តៅ សេចក្តីសុខ និងក្តីសង្ឃឹមដល់ពលរដ្ឋគ្រប់ៗរូប»។
លោកនាយករដ្ឋមន្ត្រី ហ៊ុន សែន តែងលើកឡើងពីគុណសម្បត្តិរបស់លោកនិងក្រុមរបស់លោកថា បានប្រថុយគ្រោះថ្នាក់ជាច្រើនក្នុងការតស៊ូផ្តួលរំលំរបបខ្មែរក្រហម ដើម្បីជួយជីវិតពលរដ្ឋនៅក្នុងរបបនោះ។ លោកនាយករដ្ឋមន្ត្រីក៏ធ្លាប់លើកឡើងញឹកញាប់ដែរថា ពេលអស់ពីរូបលោកឬគណបក្សប្រជាជនកម្ពុជារបស់លោកចាញ់ឆ្នោតនោះ កម្ពុជាអាចនឹងមានចលាចលកើតឡើង។
ទោះយ៉ាងណារបាយការណ៍អង្គការសង្គមស៊ីវិលជាតិនិងអន្តរជាតិបានលើកឡើងពីចំណុចខ្វះចន្លោះក្រោមការដឹកនាំរបស់លោកនាយករដ្ឋមន្ត្រី ដែលធ្វើឲ្យពលរដ្ឋរងទុក្ខវេទនាដូចជា មនុស្សជាង១លាននាក់រងគ្រោះដោយសារការបណ្តេញចេញ ដើម្បីយកដីអភិវឌ្ឍន៍ អំពើអយុត្តិធម៌នៅក្នុងសង្គម និងអំពើពុករលួយជាដើម។ ឃាតកម្មលើអ្នករិះគន់មិនទាន់អាចរកឃាតករឃើញដូចជា ករណីលោក កែម ឡី អ្នកវិភាគបញ្ហាសង្គម លោក ជា វិជ្ជា មេដឹកនាំសហជីព និងលោក ឈុត វុទ្ធី ប្រធានអង្គការការពារព្រៃឈើជាដើម៕
