លោក ហ៊ុន ម៉ានី ដែលជាកូនប្រុសរបស់លោកនាយករដ្ឋមន្រ្តី ហ៊ុន សែន និងជាប្រធានសហភាពសហព័ន្ធយុវជនកម្ពុជា ត្រូវបានជ្រើសរើសជាប្រធានក្រុមប្រឹក្សាយុវជនអាស៊ី(AYC)ដែលជាអង្គការមិនមែនរដ្ឋាភិបាលមួយធ្វើការងារលើកកម្ពស់យុវជននៅអាស៊ី។
សេចក្ដីជូនដំណឹងមួយរបស់ក្រុមប្រឹក្សាយុវជនអាស៊ីនិងសហភាពសហព័ន្ធយុវជនកម្ពុជាចេញផ្សាយនៅថ្ងៃព្រហស្បតិ៍នេះឲ្យដឹងថាមហាសន្និបាតក្រុមប្រឹក្សាយុវជនអាស៊ីលើកទី១៣ដែលរៀបចំឡើងនៅរាជធានីភ្នំពេញ កាលពីថ្ងៃទី២៥ ខែកុម្ភៈ បានបោះឆ្នោតជ្រើសរើស លោក ហ៊ុន ម៉ានី ឲ្យធ្វើជាប្រធានក្រុមប្រឹក្សាយុវជនអាស៊ី។ សេចក្ដីជូនដំណឹងឲ្យដឹងទៀតថាការបោះឆ្នោតនេះធ្វើឡើងស្របគ្នានឹងការរៀបចំវេទិកាយុវជនកម្ពុជាអាស៊ី ក្រោមប្រធានបទ”សន្តិភាព ប្រជាធិបតេយ្យនិងភាពជាដៃគូក្នុងតំបន់ឆ្ពោះទៅរកគោលដៅអភិវឌ្ឍន៍ប្រកបដោយចីរភាព“។ វេទិកានេះមានរយៈពេល៣ថ្ងៃ ចាប់ពីថ្ងៃទី២៦ដល់ថ្ងៃ២៨ ខែកុម្ភៈ ឆ្នាំ២០១៦។
ក្រុមប្រឹក្សាយុវជនអាស៊ីគឺជាអង្គការយុវជនមិនមែនរដ្ឋាភិបាលនៅកម្រិតតំបន់ដែលត្រូវបានបង្កើតឡើងកាលពី ឆ្នាំ១៩៧២ ដើម្បីផ្ដល់ជាវេទិការួមមួយដល់ថ្នាក់ដឹកនាំយុវជននិងយុវជនអាស៊ីដែលមានគោលបំណងស្រដៀងគ្នាក្នុងដំណើរការអភិវឌ្ឍសេដ្ឋកិច្ចនិងសង្គម។ ក្រុមប្រឹក្សានេះមានលេខាធិការដ្ឋាននៅទីក្រុងកូឡាឡាំពួរ ប្រទេសម៉ាឡេស៊ី។
លោក ហ៊ុន ម៉ានី មិនត្រឹមតែជាប្រធានសហភាពសហព័ន្ធយុវជនកម្ពុជាប៉ុណ្ណោះទេ លោកក៏ជាតំណាងរាស្រ្តមណ្ឌលកំពង់ស្ពឺផងដែរ។ លោកជាតំណាងរាស្រ្តវ័យក្មេងមួយរូបដែលគេសង្កេតឃើញថាបានដឹកនាំយុវជន ជាច្រើនធ្វើសម្មភាពសង្គម ជាពិសេសកម្មវិធីអង្គរសង្ក្រានដែលធ្វើឡើងនៅខេត្តសៀមរាបជារៀងរាល់ឆ្នាំ។
កាលពីខែវិច្ឆិកា ឆ្នាំ២០១៥ លោក ហ៊ុន ម៉ានី បានទទួលពានរង្វាន់អន្តរជាតិGusi Peace Prizeនៅប្រទេសហ្វីលីពីន។ លោកក៏បានទទួលពានរង្វាន់ប្រជាជនអាស៊ាន(ASEAN people’s Award)ផងដែរ។ ពានរង្វាន់ទាំងនេះទទួលបានដោយសារស្នាដៃរបស់លោកក្នុងការដឹកនាំសហភាពសហព័ន្ធយុវជនកម្ពុជានិងការចូលរួមចំណែកដល់កិច្ចសហប្រតិបត្តិការជាមួយប្រទេសជាសមាជិកអាស៊ាន៕