លោកនាយករដ្ឋមន្រ្តី ហ៊ុន សែន បានបញ្ជាឲ្យបន្តអនុវត្តពិនិត្យមើលជនបរទេសអន្តោប្រវែសន៍ដែលរស់នៅខុសច្បាប់នៅកម្ពុជា ដោយលោកថាវិធានការត្រូវតែធ្វើឡើងដោយម៉ឺងម៉ាត់និងអនុវត្តតាមច្បាប់ជាតិនិងអន្តរជាតិ។
ក្នុងពិធីបិទសន្និបាតបូកសរុបការងាររបស់ក្រសួងមហាផ្ទៃ កាលពីថ្ងៃព្រហស្បតិ៍ លោក ហ៊ុន សែន បានណែនាំឲ្យមន្រ្តីបន្តអនុវត្តវិធានការម៉ឺងម៉ាត់ទៅលើជនបរទេសខុសច្បាប់នៅកម្ពុជា។ លោកមានប្រសាសន៍ថា៖ “ត្រូវបន្តលើកកម្ពស់វិធានការក្នុងការគ្រប់គ្រងជនបរទេសអន្តោប្រវែសន៍ ដោយធ្វើបច្ចុប្បន្នភាពជាប្រចាំនូវបញ្ជីជំរឿនស្ថិតិជនបរទេសអន្តោប្រវែសន៍និងចាត់វិធានការច្បាប់ឲ្យបានម៉ឺងម៉ាត់ ចំពោះជនបរទេសដែលកាន់កាប់ឯកសារមិនស្របច្បាប់និងចាត់វិធានការតាមច្បាប់ជាតិនិងអន្តរជាតិចំពោះជនបរទេសដែលស្នាក់នៅមិនស្របច្បាប់”។
របាយការណ៍របស់អគ្គនាយកដ្ឋានអន្តោប្រវេសន៍ឲ្យដឹងថាក្នុងឆ្នាំ២០១៥ ជនអន្តោប្រវែសន៍ចំនួន៤៤២៤នាក់ត្រូវបានឃាត់ខ្លួននិងបណ្តេញចេញ ដែលក្នុងនោះភាគច្រើនជាជនជាតិវៀតណាម៕