អ្នកនាំពាក្សម្នាក់សម្រាប់ស្ថានទូតអាមេរិកនៅអង្កការសហប្រជាជាតិបាននិយាយថាក្រុងវ៉ាស៊ិនតោននៅថ្ងៃនេះ បានសម្រេចដាក់សេចក្ដីព្រាងដំណោះស្រាយទៅសុំការយល់ព្រមពីក្រុមប្រឹក្សាសន្តិសុខអង្កការសហប្រជាជាតិ ដើម្បីពង្រីកការដាក់ទណ្ឌកម្មឱ្យខ្លាំងជាងមុនលើរបបក្រុងព្យុងយ៉ាង។
អ្នកនាំពាក្យ Kurtis Cooper បាននិយាយថាលោកស្រីឯកអគ្គរដ្ឋទូត Samantha Power ត្រួវដាក់សេចក្ដីព្រាង ដំណោះស្រាយនេះទៅក្រុមប្រឹក្សាសន្តិសុខអង្កការសហប្រជាជាតិដោយស្នើឱ្យពង្រីកការដាក់ទណ្ឌកម្មប្រឆាំង កូរ៉េខាងជើងដែលជាការឆ្លើយតបការរំលោភបំពានរបស់រដ្ឋនៅអាស៊ីមួយនេះលើច្បាប់អន្តរជាតិដែលហាមសាយភាយអាវុធនុយក្លេអ៊ែរ។
ទីភ្នាក់ងារសារព័ត៌មាន Reuters បានរាយការណ៍ថាជំហររបស់អាមេរិកធ្វើឡើងបន្ទាប់ពីប្រទេសចិនដែលជាសម្ព័ន្ធរបស់កូរ៉េខាងជើងកាលពីថ្ងៃពុធបានយល់ព្រមជាមួយអាមេរិកថាត្រូវពង្រីកការដាក់ទណ្ឌកម្មសេដ្ឋកិច្ច លើកូរ៉េខាងជើង។
ក្រុមប្រឹក្សាសន្តិសុខអង្គការសហប្រជាជាតិមានសមាជិក១៥ប្រទេសក្នុងនោះមាន៥ប្រទេសជាសមាជិកអចិន្ត្រៃយ៍គឺមានអាមេរិក ចិន រុស្ស៊ី អង់គ្លេស និងបារាំង។ កូរ៉េខាងជើងបានបាញ់សាកល្បងអាវុធប្រល័យលោក ចំនួន៨ដងមកហើយចាប់តាំងពីឆ្នាំ២០០៦ដែលសហគមន៍អន្តរជាតិបានថ្កោលទោសយ៉ាងខ្លាំង៕
ប្រភព: Reuters