ប្រជាពលរដ្ឋជិត ៤០នាក់ មកពីស្រុកកំពង់សៀម បានប្រមូលផ្ដុំគ្នាតវ៉ានៅមុខគេហដ្ឋានអភិបាលខេត្តកំពង់ចាម លោក លន់ លឹមថៃ កាលពីល្ងាចថ្ងៃម្សិលមិញនេះ ដើម្បីស្វែងរកដំណោះស្រាយសម្រាប់ផលប៉ះពាល់បណ្ដាលមកពីការសាងសង់បង្គោលភ្លើង នៅក្នុងឃុំសំបួមាស។
ប្រជាពលរដ្ឋមកពីស្រុកកំពង់សៀម អ្នកស្រី មិត្ត គឹមថា បានប្រាប់វីអូឌីកាលពីថ្ងៃម្សិលមិញថា រដ្ឋាភិបាលបានសង់បង្គោលភ្លើងបញ្ជូនថាមពលអគ្គិសនីនៅក្នុងស្រុកនេះ បានធ្វើឲ្យប៉ះពាល់ដល់ផ្ទះសម្បែង និងដីធ្លីរបស់ប្រជាពលរដ្ឋជាង ៥០គ្រួសារ។
អ្នកស្រីបន្ថែមថា ការសាងសង់នេះ បានប៉ះពាល់ដីរបស់អ្នកស្រីជាង ៣០ម៉ែត្រ និងរបងផ្ទះអ្នកស្រីផងដែរ ប៉ុន្តែ អ្នកស្រីថា រដ្ឋាភិបាលមិនបានផ្ដល់សំណងសមរម្យដល់ពួកគាត់នោះឡើយ។
លោក កាន់ វណ្ណធូ ពលរដ្ឋរងផលប៉ះពាល់ម្នាក់ទៀត បានប្រាប់ថា រដ្ឋាភិបាលមិនបានជូនដំណឹងឲ្យច្បាស់លាស់ដល់ពួកគាត់នោះទេ ហើយការចរចារផ្ដល់សំណងនៃផលប៉ះពាល់ ក៏មិនបានទូលំទូលាយដែរ។
លោកបញ្ជាក់ថា៖ «ហៅចរចារម្នាក់ម្តងៗ និយាយទៅការផ្សព្វផ្សាយព័ត៌មានកន្លងមកអត់ទូលំទូលាយ តាំងពីការបោះបង្គោលទីតាំងអត់មានហៅប្រជុំជាលក្ខណៈធំដុំនៅសាលាឃុំ ឬសាលាសង្កាត់ ឬនៅកន្លែងទីតាំងណាអត់មាន គ្រាន់តាអ្នកដែលប៉ះបង្គោលល្បងហ្នឹង ហៅគាត់ឱ្យលុយ មិនប្រាប់ថាបង្គោលហ្នឹងវាប៉ិនមេច ត្រូវប៉ះពាល់យ៉ាងមេច ផលប៉ះពាល់យ៉ាងមេច សងសំណងប៉ុណ្ណឹង១.៨កាក់យើងទទួលយកបានអត់ អត់មានទេ។ ព្រោះខាងហ្នឹងគាត់ (ពលរដ្ឋរងផលប៉ះពាល់) មិនដែលឃើញដែរ ពីដំបូងគាត់ស្មានថាដូចអាបង្គោលនៅមុខផ្ទះគាត់អាប៉ុនភ្លៅនោះ»។
វីអូឌីមិនអាចសុំការបញ្ជាក់ពីអភិបាលរងខេត្តកំពង់ចាម លោក ជឹម លាវ ជុំវិញបញ្ហានេះបាននោះទេ ដោយទូរស័ព្ទចូលគ្មានអ្នកទទួល។
មន្ត្រីអង្កេតរបស់សមាគមអាដហុកប្រចាំខេត្តកំពង់ចាម លោក មាន ព្រហ្មមុនី ដែលបានតាមដានករណីនេះ បានប្រាប់វីអូឌីថា ពលរដ្ឋដែលរងផលប៉ះពាល់ទាំងនោះបានពឹងសមាគមអាដហុកធ្វើឯកសារ ដើម្បីដាក់ទៅក្រសួងពាក់ព័ន្ធនានាដើម្បីសុំអន្តរាគមន៍។
លោកបានពន្យល់យ៉ាងដូច្នេះថា៖ «ជាទូទៅ កាលណាគម្រោងរបស់រដ្ឋអីចឹង មានច្បាប់មួយគេហៅ ច្បាប់អាសានិករ។ អីចឹងរាល់គម្រោងទាំងអស់ ត្រូវដកហូតកម្មសិទ្ធិឯកជន ឯកជនរបស់រដ្ឋអី និតិបុគ្គលសារធារណៈអីដកបានទាំងអស់ ប៉ុន្តែ អសានិករនេះ នៅមាត្រា ២ គេធានាទូទាត់សំណងជាមុនដោយសមរម្យដោយយុត្តិធម៌។ យុត្តិធម៌យ៉ាងមេច? ទាល់តែគាត់ព្រមព្រៀងដែរ សមរម្យទៅតាមតម្លៃទីផ្សារអីចឹងណា។ ការអភិវឌ្ឍន៍ខ្សែបញ្ជូនថាមពលអគ្គីសនីនេះត្រូវសងមួយរយភាគរយក្នុងមាត្រា ៥ នៃច្បាប់អសានិករហ្នឹង»៕