ប្រទេសអូស្ត្រាលី និងឥណ្ឌូនេស៊ី បានប្រកាសរួមគ្នាថា ទំនាក់ទំនងយោធាដ៏ពេញលេញរវាងប្រទេសទាំងពីរ ត្រូវបានស្ដារឡើងវិញហើយ បន្ទាប់ពីយោធាឥណ្ឌូនេស៊ី បានផ្អាកកិច្ចសហប្រតិបត្តិការកាលពីខែមករាកន្លងមក ដោយសារសម្ភារៈបង្រៀនមានលក្ខណៈជេរប្រមាថ ត្រូវបានគេរកឃើញនៅឯមូលដ្ឋានមួយរបស់អូស្ត្រាលី។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
នាយករដ្ឋមន្ត្រីអូស្ត្រាលី លោក Malcolm Turnbull បានប្រកាសបែបនេះរួមគ្នាជាមួយប្រធានាធិបតីឥណ្ឌូនេស៊ី លោក Joko Widodo ដែលបានធ្វើដំណើរទៅបំពេញទស្សនកិច្ចលើកដំបូងនៅអូស្ត្រាលីកាលពីថ្ងៃម្សិលមិញនេះ។
លោក Turnbull បានថ្លែងនៅក្នុងសន្និសីទកាសែតនៅទីក្រុងស៊ីដនីថា ប្រធានាធិបតី Widodo និងរូបលោក បានឯកភាពទៅលើការស្ដារឡើងវិញនូវកិច្ចសហការខាងវិស័យការពារជាតិ ការផ្លាស់ប្ដូរការហ្វឹកហាត់ និងសកម្មភាពនានា។
ដំណើរទស្សនកិច្ចរបស់លោក Widodo ទៅកាន់អូស្ត្រាលី បានកើតឡើងមិនដល់ ២ខែផង ក្រោយពីទំនាក់ទំនងយោធារវាងប្រទេសទាំងពីរត្រូវបានផ្អាក ដែលករណីនេះ បានជំរុញឲ្យមានវិវាទកាទូតបន្តិចបន្តួច និងនាំទៅរកការថ្លែងសុំទោសពីប្រមុខកងទ័ពអូស្ត្រាលីនៅក្នុងខែកុម្ភៈនេះ។ កិច្ចសហប្រតិបត្តិការខាងវិស័យយោធារវាងប្រទេសទាំងពីរ មានចាប់ពីការហ្វឹកហាត់រួមគ្នា និងកិច្ចសហប្រតិបត្តិការខាងប្រឆាំងភេរវកម្ម រហូតដល់ការការពារព្រំដែន៕