សកម្មជនដីធ្លីដែលតែងធ្វើយុទ្ធនាការអាវខ្មៅរៀងរាល់ថ្ងៃច័ន្ទដើម្បីទាមទារឱ្យមានការដោះលែងមន្ត្រីសិទ្ធិមនុស្ស មន្ត្រីគ.ជ.ប សកម្មជនដីធ្លី អ្នកស្រីទេព វន្នី និងរកយុត្តិធម៌សម្រាប់លោក កែម ឡី នោះ នឹងផ្អាកយុទ្ធនាការថ្ងៃចន្ទពណ៌ខ្មៅរបស់ពួកគេនៅថ្ងៃស្អែកនេះ។
កញ្ញា សុង ស្រីលាភ សកម្មជនដីធ្លីបឹងកក់ បានប្រាប់វីអូឌីនៅរសៀលថ្ងៃនេះថា សកម្មជនដីធ្លីនៅបឹងកក់នឹងផ្អាកយុទ្ធនាការថ្ងៃចន្ទពណ៌ខ្មៅមួយសប្តាហ៍សិន ព្រោះពួកគាត់ត្រូវទៅសាលាឧទ្ធរណ៍ដើម្បីចាំស្តាប់សាលក្រមករណីអ្នកស្រី ទេព វន្នី នៅថ្ងៃទី២៧ ខែកុម្ភៈនេះ។
អ្នកស្រីបានបញ្ជាក់ថា៖ «តាំងពីយើងចូលរួមធ្វើយុទ្ធនាការថ្ងៃចន្ទពណ៌ខ្មៅ គឺយើងមិនបានទទួលលទ្ធផលយុត្តិធម៌អ្វីសំរាប់ពួកគាត់ ឬក៏អង្គការសង្គមស៊ីវិល ឬក៏អ្នកស្រី ទេព វន្នី ទេ ប៉ុន្តែ អ្វីដែលយើងទទួលបាន គឺការគាំទ្រ ហើយមួយទៀត យើងបានធ្វើសកម្មភាពផ្តល់ការលើកទឹកចិត្តចំពោះគាត់ដែលជាប់ពន្ធនាគារដោយមិនបានធ្វើអ្វីខុស ហើយឱ្យពួកគាត់ជាមនុស្សបរិសុទ្ធ។ បើពួកគាត់មិនមែនជាមនុស្សបរិសុទ្ធ ពួកខ្ញុំជាសហគមន៍ គឺមិនអាចគាំទ្រគាត់បានទេ។ អីចឹងសកម្មភាពនេះ ទោះបីមិនបានលទ្ធផលពីសំណាក់រដ្ឋាភិបាល និងតុលាការ ប៉ុន្តែ យើងបានលទ្ធផលលើកទឹកចិត្តពួកគាត់ បញ្ជាក់ថា គាត់មិនឯកការ ហើយពួកយើងនៅតែគាំទ្រគាត់ ហើយសបញ្ជាក់មួយទៀត គឺភាពស្អាតស្អំរបស់គាត់»។
កញ្ញាបន្ថែមថា បើទោះជាថ្ងៃស្អែកនេះ តុលាការសាលាឧទ្ធរណ៍មិនទំលាក់ការចោទប្រកាន់ទៅលើអ្នកស្រី ទេព វន្នី ក៏ដោយ ក៏ពួកគាត់នឹងបន្តទាមទារទម្លាក់ការចោទប្រកាន់នេះទៅតុលាកំពូលបន្តទៀត។
កញ្ញាថា សហគមន៍បឹងកក់ នឹងបន្តការដាក់ញ្ញត្តិសុំកិច្ចអន្តរាគមន៍ពីក្រសួងនានា និងស្ថានប័នរបស់រដ្ឋាភិបាល និងស្ថានទូតមួយចំនួនទៀតនៅកម្ពុជា ដើម្បីជំរុញឱ្យមានយុត្តិធម៌នៅកម្ពុជា៕
