រដ្ឋាករទឹកស្វយ័តក្រុងភ្នំពេញ ឲ្យដឹងថានឹងចាត់ក្រុមការងារចុះវាស់ស្ទង់គុណភាពនាឡិកាទឹកដែលមានអាយុកាលជាង១០ឆ្នាំឡើងទៅ ឬផ្លាស់ប្តូរនាឡិកាទឹក ការផ្គត់ផ្គង់ទឹកនៅតាមបណ្តាគេហដ្ឋានប្រជាពលរដ្ឋក្នុងខណ្ឌទូលគក នៅដើមខែមេសាខាងមុខ។
ក្នុងសេចក្តីជូនដំណឹងរបស់រដ្ឋាករទឹកស្វយ័តក្រុងភ្នំពេញ ចុះថ្ងៃទី២៥ ខែមីនា ឆ្នាំ២០១៦ ឲ្យដឹងថា ក្រុមជាងរបស់រដ្ឋាករទឹកស្វយ័តក្រុងភ្នំពេញនិងចុះពិនិត្យវាស់ស្ទង់គុណភាពនាឡិកាទឹកនៅតាមបណ្តាញដែលមានអាយុប្រើប្រាស់១១ឆ្នាំឡើង ដោយដាក់នាឡិកាទឹកថ្មីជំនួសនៅថ្ងៃទី១ ខែមេសា ឆ្នាំ២០១៦។
សេចក្តីជូនដំំណឹងដដែលបន្តថា អំឡុងពេលកំពុងធ្វើការពិនិត្យ វាស់ស្ទង់ ឬផ្លាស់ប្តូរនាឡិកាទឹក ការផ្គត់ផ្គង់ទឹកនៅតាមបណ្តាគេហដ្ឋាននីមួយៗ អាចមានភាពរអាក់ រអួលរយៈពេលខ្លី តែមិនលើសពី២ម៉ោងឡើយ។ រដ្ឋាករទឹកស្វយ័តក្រុងភ្នំពេញ ស្នើទៅអតិថិជនទាំងអស់ចូលរួមឬចាត់តំណាងសហការ និងទទួលយកការដាក់នាឡិកាថ្មី តាមការស្នើសុំរបស់រដ្ឋាករទឹកផង។
រដ្ឋាករទឹកបញ្ជាក់ថា សម្រាប់ការពិនិត្យ និងផ្លាស់ប្តូរនាឡិកាទឹកនេះ អតិថិជនពុំត្រូវចំណាយអ្វីទាំងអស់ បើមានព័ត៌មានបន្ថែម ទាក់ទងទូរស័ព្ទលេខ ០២៣ ៧២៤ ០៤៦ រាល់ម៉ោងធ្វើការ៕