យ៉ាងហោចណាស់ផ្ទះរបស់ប្រជាពលរដ្ឋចំនួន ៣៧គ្រួសារ នៅស្រុកចំនួន ៤ ក្នុងខេត្តបាត់ដំបង បានដួលរលំ នៅពេលខ្យល់កន្ត្រាក់អំឡុងពេលភ្លៀងកក់ខែ បានបោកបក់ទៅលើកាលពីថ្ងៃទី២៤ ខែមីនា។
វេបសាយនគរបាលជាតិកម្ពុជា បានចុះផ្សាយថា ភ្លៀងធ្លាក់កក់ខែ និងខ្យល់កន្ត្រាក់ កាលពីថ្ងៃទី២៤ ខែមីនានេះ បានធ្វើឲ្យខូចខាតផ្ទះប្រជាពលរដ្ឋនៅស្រុកថ្មគោល ២៧ខ្នង ស្រុកបាណន់ចំនួន ៤ខ្នង ស្រុកបវេលចំនួន ៥ខ្នង និងស្រុករុក្ខគិរី ១ខ្នង។ ប៉ុន្តែ គ្មាននរណាម្នាក់ ត្រូវបានគេរាយការណ៍ថារងគ្រោះថ្នាក់នៅអំឡុងពេលនោះទេ។
កាលពីថ្ងៃទី២៣ ខែមីនានេះ ក្រសួងធនធានទឹក និងឧតុនិយម បានព្រមានទៅដល់ប្រជាពលរដ្ឋ ឲ្យប្រុងប្រយ័ត្នចំពោះភ្លៀងកក់ខែ និងខ្យល់កន្ត្រាក់នៅក្នុងរដូវប្រាំងនេះ ចាប់ពីសប្ដាហ៍នេះរហូតដល់ដើមខែមេសាខាងមុខនេះ៕
