អគ្គនាយកដ្ឋានពន្ធដារ បានអះអាងថា ខ្លួនពុំធ្លាប់ចេញគោលការណ៍ឲ្យមន្ត្រីចុះធ្វើសវនកម្មលើប្រជាពលរដ្ឋប្រកបអាជីវកម្មតូចតាច ទាបជាងកម្រិតជាប់កាតព្វកិច្ចបង់ពន្ធនោះឡើយ។
ក្នុងសេចក្ដីប្រកាសព័ត៌មានកាលពីថ្ងៃម្សិលមិញនេះ អគ្គនាយកដ្ឋានពន្ធដារ បានលើកឡើងថា មានជនខិលខូចមួយចំនួន ដែលអាចជាអ្នករត់ការ ឬមន្ត្រីពន្ធដារខិលខូច បានប្រើឧបាយកលបោកបញ្ឆោតពលរដ្ឋជាប់ពន្ធធ្លាប់ស្ថិតក្រោមរបបម៉ៅការ ដើម្បីជំរិតទារប្រាក់ ក្រោមរូបភាពចុះធ្វើសវនកម្ម ឬចុះត្រួតពិនិត្យ។
ស្ថាប័ននេះអះអាងថា ខ្លួនមិនដែលធ្វើដូច្នេះទេ ហើយបានអំពាវនាវទៅដល់ប្រជាពលរដ្ឋ ឲ្យរាយការណ៍អំពីបុគ្គលណាដែលបានប្រើឧបាយកលបោកបញ្ឆោត ព្រមទាំងចាត់វិធានការភ្លាម។
អគ្គនាយកដ្ឋានពន្ធដារ បានបញ្ជាក់ជាថ្មីថា រដ្ឋាភិបាលមិនបានយកពន្ធពីប្រជាពលរដ្ឋ ដែលប្រកបផលរបរតិចជាង ២៥០លានរៀលក្នុងមួយឆ្នាំ ពោលគឺមិនស្ថិតក្រោមកាតព្វកិច្ចបង់ពន្ធនោះឡើយ៕