ប្រទេសចិន នៅថ្ងៃនេះ បានដាក់ឲ្យប្រើប្រាស់នូវនាវាផ្ទុកយន្តហោះផលិតក្នុងស្រុកជាលើកដំបូង ខណៈដែលប្រទេសនេះព្យាយាមកែប្រែកងទ័ពជើងទឹករបស់ខ្លួនទៅជាកម្លាំងមានសមត្ថភាពប្រយុទ្ធនៅលើសមុទ្រ។ នេះដោយយោងតាមការចុះផ្សាយរបស់ទីភ្នាក់ងារ AFP។
AFP បានដកស្រង់ព័ត៌មានពីទីភ្នាក់ងារព័ត៌មានរដ្ឋចិនស៊ីនហួ ដែលបានផ្សាយថា នាវានោះត្រូវបានគេទម្លាក់ចុះទឹកនៅកំពង់ផែទីក្រុងដាលៀន ស្ថិតនៅភាគឦសានប្រទេសចិន។
វាគឺជានាវាដឹកយន្តហោះទីពីររបស់ប្រទេសចិន។ នាវាដឹកយន្តហោះទីមួយឈ្មោះ លាវនីង គឺជានាវាចាស់របស់អតីតសហភាពសូវៀត ដែលត្រូវបានកសាងឡើងកាលពីជាង ២៥ឆ្នាំមុន។ នាវានោះត្រូវបានដាក់ឲ្យប្រើប្រាស់នៅក្នុងកងទ័ពជើងទឹកចិនកាលពីឆ្នាំ២០១២ បន្ទាប់ពីជួសជុលឡើងវិញរួចរាល់។
ក្រសួងការពារជាតិចិន បាននិយាយកាលពីមុនថា នាវាផ្ទុកយន្តហោះថ្មីនេះ មានទម្ងន់ ៥ម៉ឺនតោន និងប្រើប្រាស់ម៉ាស៊ីនដើរដោយចំហេះធម្មតា មិនមែនដើរដោយថាមពលនុយក្លេអ៊ែរនោះឡើយ។
នាវាថ្មីនេះ ត្រូវបានគេជឿថានឹងផ្ទុកយន្តហោះចម្បាំង J-15 របស់ចិន រួមជាមួយយន្តហោះផ្សេងទៀត៕
