តុលាការជាន់ខ្ពស់បានលើកពេលសវនាការ តាមការស្នើសុំរបស់មេធាវីការពារក្តីឲ្យសកម្មជនបក្សប្រឆំាងទំាង១១នាក់ ពាក់ព័ន្ធនឹងហិង្សានៅក្បែរទីលានប្រជាធិបតេយ្យ កាលពីឆ្នាំ២០១៤ ដោយថាអវត្តមានដើមបណ្តឹង។
ប្រធានក្រុមប្រឹក្សាជំនុំជម្រះ លោក ប្លង់ សំណាង ប្រកាសនៅក្នុងសវនាការនាព្រឹកថ្ងៃទី២៦ខែមេសានេះថា តុលាការលើកពេលសវនាការលើសំណុំរឿងនេះ តាមការស្នើសុំរបស់ក្រុមមេធាវីការពារក្តីឲ្យសកម្មជនបក្សប្រឆំាង។ ប៉ុន្តែលោកមិនបានបញ្ជាក់ថា នឹង បើកសវនាការនៅពេលណាជាក់លាក់នោះទេ។
មេធាវី លោក ជួង ជូងី ក្នុងចំណោម៣រូបផ្សេងទៀត ដែលការពារក្តីឲ្យកម្មជនបក្សប្រឆំាងទំាង១១នាក់ បានថ្លែងប្រាប់អ្នកសារព័ត៌មានថា សវនការនៅថ្ងៃពុធនេះ ពាក់ព័ន្ធនឹងបណ្តឹងសុំបដិសេធការសម្រេចរបស់សាលាដំបូង(បណ្តឹងសាលាទុក្ខសុំមោឃភាពនីតិវិធីសាលាដំបូង) កាលពីថ្ងៃទី២១ ខែកក្កដា ឆ្នាំ២០១៥ ដែលផ្តន្ទាទោសកូនក្តីលោកពី៧ទៅ២០ឆ្នាំ ករណីហិង្សានៅក្បែរទីលានប្រជាធិបតេយ្យ។
ប៉ុន្តែលោក ជូងី អះអាងថា ដោយពុំឃើញមានវត្តមានដើមបណ្តឹងរដ្ឋប្បវេណី ដែលប្តឹងកូនក្តីលោកចូលបំភ្លឺក្នុងនាមជាសាក្សីក្នុងបន្ទប់សវនាការ ទើបក្រុមមេធាវីស្នើទៅសាលាឧទ្ធរណ៍លើកពេលសវនាការ។ ករណីនេះ លោកបានពន្យល់តាមនីតិវិធីច្បាប់ដូចនេះថា «កូនក្តីខ្ញុំ ក៏ដូចខ្ញុំជាមេធាវីរកឃើញថាសវនាការកាលពីថ្ងៃទី២១កក្កដា ឆ្នាំ២០១៥នៅសាលាដំបូងរាជធានីភ្នំពេញប្រព្រឹត្តទៅដោយខុសច្បាប់ដោយអត់មានមេធាវី ប៉ុន្តែពេលនោះ មានដើមបណ្តឹង៤១រូប[សន្តិសុខខ័ណ្ឌដូនពេញ]ចូលរួម អញ្ចឹងគាត់ទៅជាសាក្សី ហើយបើសិនជាគាត់នៅតែមិនចូល នេះគឺជាកាតព្វកិច្ចរបស់តំណាងអយ្យការអមសាលាឧទ្ធរណ៍ថាតើគាត់ត្រូវបំពេញកាតព្វកិច្ចរបស់គាត់របៀបណា ខ្ញុំមានសិទ្ធិទទូចទាមទារ ប៉ុន្តែខ្ញុំអត់មានអំណាចចាប់បង្ខំសាក្សីទេ ប៉ុន្តែតំណាងមហាអយ្យការមានអំណាចចាប់បង្ខំ ក្នុងរឿងឧក្រិដ្ឋ ក្នុងរឿងព្រហ្មទណ្ឌ តំណាងមហាអយ្យការមានសិទ្ធិចាប់បង្ខំសាក្សីមកបំភ្លឺ បង្ហាញការពិត ពីព្រោះកន្លងមកមានសាក្សី[ករណីលោក កឹម សុខា]ដែលត្រូវបានសាលាដំបូងរាជធានីភ្នំពេញកោះហៅឲ្យចូលបំភ្លឺ បែរមិនចូលគាត់ផ្តន្ទាទោស»។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្ស អង្គការលីកាដូ លោក អំ សំអាត យល់ថា ដើម្បីឲ្យការកាត់សេចក្តីប្រកបដោយយុត្តិធម៌និងតម្លាភាព តុលាការគួរតែកោះហៅគូភាគីនៅក្នុងសំណុំរឿងខាងលើនេះដើម្បីឲ្យបានចូលបំភ្លឺតតំាងគ្នានៅចំពោះមុខក្រុមប្រឹក្សាជម្រះក្តី។ លោកនិយាយ «អវត្តមាននៃភាគីណាមួយ វាធ្វើឲ្យចន្លោះប្រហោងនៃភាពយុត្តិធម៌ ខ្ញុំគិតថាតុលាការគួរតែកោះអញ្ជើញគ្រប់ភាគីឲ្យចូលរួមឲ្យបានគ្រប់គ្នា វាជាតម្លាភាព ហើយនឹងភាពយុត្តិធម៌ ហើយផ្លូវច្បាប់គឺតម្រូវអញ្ចឹង»។
គួរបញ្ជាក់ថា កាលពីខែកក្កដា ឆ្នាំ២០១៥ ចៅក្រមសាលាដំបូងរាជធានីភ្នំពេញបានសម្រេចផ្តន្ទាទោសសកម្មជនទាំង១១នាក់របស់គណបក្សសង្គ្រោះជាតិឲ្យជាប់ពន្ធនាគារម្នាក់ៗពី៧ទៅ២០ឆ្នាំក្រោមបទចោទចូលរួមនិងដឹកនាំកុប្បកម្មនៅក្បែរទីលានប្រជាធិបតេយ្យកាលពីថ្ងៃទី១៥ កក្កដា ឆ្នាំ២០១៤។ ក្រោយមកមេធាវីការពារក្តី បានប្តឹងទៅសាលាឧទ្ធរណ៍ និងតុលាការកំពូល ដើម្បីបដិសេធការសម្រេចរបស់សាលាដំបូង ឬហៅថាស្នើសុំមោឃភាពនីតិវិធីរបស់សាលាដំបូងរាជធានីភ្នំពេញដោយថាការសម្រេចរបស់សាលាដំបូងធ្វើខុសនីតិវិធីច្បាប់៕
