ក្រមព្រហ្មទណ្ឌថ្មីមួយ ដែលអនុញ្ញាតឲ្យតម្រួតថៃលួចស្ដាប់សំឡេងសន្ទនាតាមទូរស័ព្ទនៅក្រោមលក្ខខណ្ឌជាក់លាក់នោះ ត្រូវបានគណៈរដ្ឋមន្ត្រីថៃអនុម័តនៅថ្ងៃនេះ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន Reuters។
ការសម្រេចថ្មីនេះ មានបំណងផ្ដល់អំណាចបន្ថែមទៀតដល់តម្រួតថៃ ឲ្យថតសំឡេងសន្ទនាតាមទូរស័ព្ទ តាមរយៈការកែប្រែក្រមព្រហ្មទណ្ឌឆ្នាំ១៩៣៤ ហើយវាក៏ជាវិធានការសន្តិសុខថ្មីបំផុត ដែលរដ្ឋាភិបាលយោធាថៃបញ្ចេញ ក្រោយពីឡើងកាន់អំណាចនៅក្នុងរដ្ឋប្រហារមិនបង្ហូរឈាមកាលពីឆ្នាំ២០១៤។
អ្នកនាំពាក្យរដ្ឋាភិបាលយោធាថៃ បាននិយាយថា តម្រួតថៃដែលចង់លួចស្ដាប់សំឡេងទូរស័ព្ទ នឹងត្រូវស្នើសុំការអនុញ្ញាតពីតុលាការ ហើយថា សាធារណជនមិនចាំបាច់ព្រួយបារម្ភអំពីសិទ្ធិឯកជនភាពនោះឡើយ។
យោងតាមកាសែតថៃ មាត្រាថ្មីនោះ បានចែងថា តម្រួតថៃអាចស្នើសុំការអនុញ្ញាតពីតុលាការ ដើម្បីស្ដាប់ការសន្ទនាតាមទូរស័ព្ទរបស់ជនសង្ស័យណាម្នាក់ ដែលបានប្រព្រឹត្ត ឬត្រៀមប្រព្រឹត្តបទល្មើសទាក់ទងនឹងសន្តិសុខជាតិ ឬសីលធម៌សាធារណៈ ក្នុងនោះមានទាំងបទល្មើសទាំងអស់ដែលគេពិបាកស្វែងរកភស្តុតាង៕