រថយន្តសណ្ដោងផ្ទុកទៅដោយសម្ភារៈការពារមីស៊ីល THAAD របស់អាមេរិក ត្រូវបានគេដឹកចូលទៅដល់ទីតាំងដាក់ពង្រាយនៅក្នុងប្រទេសកូរ៉េខាងត្បូងហើយនៅថ្ងៃនេះ ខណៈដែលមានភាពតានតឹងកាន់តែខ្លាំងជុំវិញកម្មវិធីនុយក្លេអ៊ែរ និងគ្រាប់មីស៊ីលរបស់កូរ៉េខាងជើង។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP ដែលផ្អែកតាមទីភ្នាក់ងារព័ត៌មានកូរ៉េខាងត្បូងយ៉ុនហាប់។
យ៉ុនហាប់ បានចុះផ្សាយថា ដំណើរទៅដល់នៃរថយន្តសណ្ដោង ៦គ្រឿងនៅឯទីតាំងវាយកូនហ្គូលនោះ បានបង្កឲ្យមានការប៉ះទង្គិចគ្នារវាងអ្នកស្រុក និងប៉ូលិស។
ក្រុងវ៉ាស៊ីងតោន និងក្រុងសេអ៊ូល កំពុងតែដាក់ពង្រាយប្រព័ន្ធ THAAD ដើម្បីទប់ទល់នឹងការគំរាមកំហែងពីកូរ៉េខាងជើង ដែលកំពុងតែជំរុញកម្មវិធីផលិតគ្រាប់មីស៊ីលរបស់ខ្លួន បើទោះបីជារងទណ្ឌកម្មជាច្រើនពីអង្គការសហប្រជាជាតិក៏ដោយ។
ប្រព័ន្ធ THAAD គឺជាប្រព័ន្ធតាមចាប់ និងបំផ្លាញគ្រាប់មីស៊ីលរយៈចម្ងាយខ្លី និងរយៈចម្ងាយមធ្យម ក្រោយពីវាត្រូវបានបាញ់ចេញ។
ទោះជាយ៉ាងណា ប្រទេសចិនបានជំទាស់យ៉ាងខ្លាំងទៅនឹងការដាក់ពង្រាយប្រព័ន្ធការពារមីស៊ីលនេះ ដោយបារម្ភថា វានឹងធ្វើឲ្យអន្តរាយដល់អំណាចយោធារបស់ខ្លួន៕