តាមគម្រោងមេដឹកនាំកូរ៉េខាងជើងលោក គីម ជុងអ៊ុន នឹងជួបជាមួយមេដឹកនាំកូរ៉េខាងត្បូង លោក មូនជែ អ៊ីន នៅថ្ងៃសៅរ៍ទី២៧ចុងសប្តាហ៍នេះ ហើយនឹងជួបជាមួយមេដឹកនាំអាមេរិកលោក ដូណល ត្រាំនៅដើមខែមិថុនាខាងមុខ។
គោលបំណងនៃការជួបនេះគឺការដោះស្រាយបញ្ហានយោបាយដើម្បីរក្សាសន្តិសុខនៅក្នុងតំបន់ ហើយកូរ៉េខាងត្បូង និងអាមេរិកចង់ឲ្យកូរ៉េខាងជើងរំលាយចោលកម្មវិធីអាវុធនុយក្លេអ៊ែ។
ទន្ទឹមនឹងថ្ងៃកំណត់ជួបមេដឹកនាំអាមេរិកនិងមេដឹកនាំកូរ៉េខាងត្បូងជិតដល់នោះ មេដឹកនាំចិននិង មេដឹកនាំរុស្ស៊ីដែលមិនបានត្រៀមទុកមុនក៏បញ្ជាក់ថា ពួកគេនឹងជួបជាមួយមេដឹកនាំកូរ៉េខាងជើងនៅពេលឆាប់ៗខាងមុខនេះដែរ។
មន្ត្រីជាន់ខ្ពស់របស់ចិនថ្លែងប្រាប់CNNថា លោក ស៊ី ជីនពីង ប្រធានាធិបតីចិននឹងធ្វើដំណើរទៅកាន់ទីក្រុងព្យុងយ៉ាងនៅពេលឆាប់ៗខាងមុខនេះ។ ទោះយ៉ាងណាមន្ត្រីនោះមិនបានបញ្ជាក់ថា ដំណើរទស្សនកិច្ចរបស់លោក ស៊ី ចាប់ផ្តើមនៅថ្ងៃណា និងមានចំណុចសំខាន់ៗអ្វីខ្លះដើម្បីពិភាក្សានោះទេ។
ទោះយ៉ាងណាបច្ចុប្បន្ននេះ ចិនគឺជាប្រទេសសម្ព័ន្ធមិត្តតែមួយគត់របស់កូរ៉េខាងជើង ឬអាចថា កូរ៉េខាងជើងកំពុងតែត្រូវការចិនជួយដើម្បីទប់ទល់សម្ពាធពីអាមេរិកនិងសម្ព័ន្ធមិត្តរបស់អាមេរិក។
កាលពីថ្ងៃទី២៦ខែកុម្ភៈលោក គីម ជុងអ៊ុន និង ភរិយាបានធ្វើដំណើរទៅកាន់ទីក្រុងប៉េកាំង ដែលមានលក្ខណៈបិទបាំង ប៉ុន្តែក្រោយមកក៏ផ្សព្វផ្សាជាសាធារណៈ។
មានការវិភាគជាច្រើនលើកឡើងថា ដំណើរទស្សនកិច្ចដែលធ្វើឡើងហើយ និងដំណើរទស្សនកិច្ចដែលគ្រោងធ្វើនៅពេលឆាប់ៗនេះរវាងមេដឹកនាំចិននិងកូរ៉េខាងជើង គ្មានអ្វីក្រៅពីការរៀបចំផែនការទប់ទល់ជាមួយអាមេរិកនិងសម្ព័ន្ធមិត្តផ្សេងទៀតដែលកំពុងរៀបចំឲ្យមានការរំលាយកម្មវិធីអាវុធនុយក្លេអ៊ែរបស់កូរ៉េខាងជើង។
ចំណែកប្រទេសរុស្ស៊ីដែលមានព្រំដែនជាប់ជាមួយកូរ៉េខាងជើង ហើយការទំនាក់ទំនងជាមួយប្រទេសទាំងពីរធ្លាក់ចុះជាច្រើនឆ្នាំមកនេះ ក៏ស្ទុះស្ទារទៅរកកូរ៉េខាងជើងដែរ។
រដ្ឋមន្ត្រីការបរទេសរុស្ស៊ីលោក Sergey Lavrov ថ្លែងថា លោកបានទទួលលិខិត របស់កូរ៉េខាងជើងហើយកាលពីសប្តាហ៍មុនដែលអញ្ជើញលោកទៅបំពេញទស្សនកិច្ចនៅទីក្រុងព្យូងយ៉ាង ប៉ុន្តែមិនបានបញ្ជាក់ថ្ងៃជាក់លាក់ទេ។ រដ្ឋមន្ត្រីការបរទេសរុស្ស៊ីថ្លែងថា ក្នុងដំណើរទស្សនកិច្ចនេះជាផ្នែកមួយដែលអាចបើកផ្លូវឲ្យលោក វ្លាឌី ពូទីនជួបប្រជុំដើម្បីជជែកការងារសំខាន់ៗជាមួយលោក គីម ជុងអ៊ុននៅពេលឆាប់ៗ។
បើពិនិត្យមើលផលប្រយោជន៍សេដ្ឋកិច្ចប្រទេសចិននិងរុស្ស៊ី ជាយក្សនៅអាស៊ីនោះ ទទួលបានតិចតួចណាស់ពីប្រទេសកូរ៉េខាងជើងតូចមួយ ប៉ុន្តែបើនិយាយពីស្ថានភាពនយោបាយ និងការពង្រឹងសន្តិសុខវិញ កូរ៉េខាងជើងហាក់មានផលប្រយោជន៍ខ្លាំងណាស់សម្រាប់ប្រទេសទាំងពីរ។
បច្ចុប្បន្នទាំងចិននិងរុស្ស៊ីហាក់កំពុងមានការរត់ប្រឆាំងទាំងផ្នែកសេដ្ឋកិច្ចនិង អាវុធជាមួយអាមេរិក។ ដោយកូរ៉េខាងជើងជាប្រទេសមួយដែលគេស្គាល់ថា មានផ្ទៃដីតូច តែហ៊ានព្រមានបាញ់ប្រហារដោយអាវុធនុយក្លេអ៊ែពីទៅកាន់អាមេរិកនិងសម្ព័ន្ធមិត្តរបស់អាមេរិកជាញឹកញាប់ ពិសេសគឺកូរ៉េខាងត្បូងនិងជប៉ុន។
ក្នុងស្ថានភាពដែលកូរ៉េខាងជើងកំពុងទទួលរងទណ្ឌកម្មសេដ្ឋកិច្ចនិងសម្ពាធឲ្យរំលាយចោលកម្មវិធីអាវុធនុយក្លេអ៊ែ ចិននិងរុស្ស៊ីហាក់កំពុងចេញមុខការពារ ឬ សម្របសម្រួលរកផ្លូវកណ្តាលមួយដើម្បីកុំឲ្យកូរ៉េខាងជើងខាតបង់ច្រើនពេក។
