របាយការណ៍បង្ហាញថា ការប្រមូលពន្ធរយៈពេលបីខែដើមឆ្នាំ២០១៨កើនឡើងជាង៦៧លានដុល្លារអាមេរិក បើប្រៀបធៀបនឹងរយៈពេលដូចគ្នានេះកាលពីឆ្នាំ២០១៧។
យោងតាមសេចក្តីប្រកាសព័ត៌មានរបស់អគ្គនាយកដ្ឋានពន្ធដារ ចេញកាលពីថ្ងៃពុធម្សិលមិញ ដែលស្រង់សំដីរបស់លោកគង់ វិបុល ប្រតិភូរាជរដ្ឋាភិបាលនិងជាអគ្គនាយកនៃអគ្គនាយកដ្ឋានពន្ធដារ បង្ហាញថាអគ្គនាយកដ្ឋានពន្ធដារប្រមូលចំណូលពីពន្ធគ្រប់ប្រភេទបានជាង៧៦១លានដុល្លារអាមេរិកក្នុងត្រីមាសទី១ឆ្នាំ២០១៨។ បើតាមសេចក្តីប្រកាសព័ត៌មាននេះ ចំនួនសរុបនៃការប្រមូលពន្ធស្មើនឹង ៣៩,៦% នៃផែនការកំណត់ដោយច្បាប់។
រដ្ឋាភិបាលកម្ពុជាគ្រោងចំណាយថវិកាចំនួនប្រមាណជា៦ពាន់លានដុល្លារអាមេរិក សម្រាប់គម្រោងចំណាយឆ្នាំ២០១៨។ ចំណាយនេះត្រូវបានបង្កើនសម្រាប់វិស័យអប់រំ ការពារជាតិ និងសិល្បៈ៕