អង្គការ សម្ព័ន្ធខ្មែរជំរឿននិងការពារសិទ្ធិមនុស្ស (លីកាដូ) រកឃើញថា អ្នកដែលងាយរងគ្រោះដោយអំពើទារុណកម្មជាងគេ គឺកុមារ និងអ្នកទោសជាប់ពន្ធនាគារ។
ក្នុងថ្ងៃខួបលើកទី៣០ នៃទិវាអន្តរជាតិគាំពារជនរងគ្រោះដោយអំពើទារុណកម្ម ថ្ងៃនេះ លីកាដូ បានរំលឹកនៅ Facebook របស់ខ្លួនថា៖ «អំពើទារុណកម្ម គឺត្រូវបានហាមឃាត់នៅក្នុងច្បាប់ជាតិកម្ពុជា និងច្បាប់អន្តរជាតិ»។ ប៉ុន្តែ «អំពើទារុណកម្ម នៅតែបានកើតឡើងនៅក្នុងប្រទេសកម្ពុជា ទាំងនៅក្នុងប៉ុស្តិ៍នគរបាល ពន្ធនាគារ ឬមណ្ឌលឃុំឃាំងនានាផ្សេងទៀត។ ជនរងគ្រោះ ភាគច្រើនជាជនដែលងាយរងគ្រោះជាងគេនៅក្នុងសង្គម ជាពិសេសកុមារ និងអ្នកទោសពន្ធនាគារ»។
លីកាដូ សំណូមពរយ៉ាងទទូច សូមឲ្យបញ្ឈប់នូវគ្រប់ទម្រង់នៃអំពើទារុណកម្មនៅក្នុងប្រទេសកម្ពុជា ហើយសូមឲ្យផ្តល់នូវយុត្តិធម៌សម្រាប់ជនរងគ្រោះនៃអំពើនេះ និងក្រុមគ្រួសាររបស់អ្នកទាំងនោះផងដែរ។
ថ្ងៃនេះ គឺជាទិវាអន្តរជាតិគាំពារជនរងគ្រោះដោយអំពើទារុណកម្ម ដែលជាគម្រប់ខួបទី៣០ នៃសន្ធិសញ្ញាអង្គការសហប្រជាជាតិប្រឆាំងនឹងការធ្វើទារុណកម្ម និងការប្រព្រឹត្តមកលើខ្លួន ឬទណ្ឌកម្មឯទៀត ដែលឃោឃៅ អមនុស្សធម៌ ឬបន្ថោកបន្ទាប បានចូលជាធរមាន។
ប្រជាពលរដ្ឋ និងអង្គការផ្សេងទៀតទូទាំងពិភពលោកបានប្រារព្ធទិវានេះ ចំណែកឯអង្គការលីកាដូ បានតាំងស្លាកនៅមុខការិយាល័យរបស់ខ្លួនដែលមានរូបបាតដៃ និងមានសរសេរអក្សរថា «បញ្ឈប់អំពើទារុណកម្ម»៕