លោកនាយករដ្ឋមន្ត្រី ហ៊ុន សែន បានប្រតិកម្មទៅនឹងបក្សប្រឆាំង និងក្រុមអង្គការសង្គមស៊ីវិល ដែលបង្កើតឲ្យមានបន្ទប់ស្ថានការណ៍ដើម្បីឃ្លាំមើលការបោះឆ្នោត ដោយថា ទាល់តែសម្លាប់លោកបាន ទើបពួកគេទទួលស្គាល់ថាការបោះឆ្នោត សេរីត្រឹមត្រូវនិងយុត្តិធម៌។
ក្នុងពិធីចែកសញ្ញបត្រដល់និស្សិត នៅរាជធានីភ្នំពេញ នាថ្ងៃទី២៦ខែមិថុនានេះ លោកនាយករដ្ឋមន្ត្រីថ្លែងថា លោកទទួលយកលទ្ធផលបោះឆ្នោត ដែល គ.ជ.ប បានប្រកាសផ្លូវការកាលពីថ្ងៃម្សិញនេះ។
ប៉ុន្តែលោក ហ៊ុន សែន ថាគណបក្សនយោបាយខ្លះ និងមន្ត្រីអង្គការឃ្លាំមើលការបោះឆ្នោតថា ពួកគេមិនទទួលស្គាល់ថា ការបោះឆ្នោតជ្រើសរើសក្រុមប្រឹក្សាឃុំសង្កាត់ឆ្នាំ២០១៧នេះ សេរីត្រឹមត្រូវនិងយុត្តិធម៌ទេ។
លោកថា៖ «ប៉ុន្តែបែជាបក្សនយោបាយមួយ និងអង្គការក្រៅរដ្ឋាភិបាលមួយ ដែលគេហៅថាមានបន្ទប់ [ស្ថានការណ៍បោះឆ្នោត]ចាត់ទុកថាមិនទាន់សេរីទេ។ អញ្ចឹងទេខ្ញុំចាត់ទុកថា ភាពសេរីរបស់គេ ទាល់តែគេដើរចូលផ្ទះនាយករដ្ឋមន្ត្រី ឬក៏សម្លាប់នាយករដ្ឋមន្ត្រីនៅនឹងកន្លែង អាហ្នឹងសេរីហើយអញ្ចឹងរឿងបែបនេះ។ ប៉ុណ្ណឹងហើយហ្អាស!គេថាអត់ទៀតដោយសារលោកនេះជាប់ទោស លោកនោះអញ្ចុះ រឿងវាអញ្ចេះ រឿងវាអញ្ចុះ»។
លោក ហ៊ុន សែន លើកឡើងទៀតថា កន្លងទៅអង្គការមួយបានលើកឡើងពីភាពមិនប្រក្រតីនៃការបោះពុម្ភសន្លឹកឆ្នោតលើស និងទឹកថ្មាំជ្រលក់ដៃសម្រាប់បម្រើឲ្យបោះឆ្នោតលាងជ្រះជាដើម ដែលលោកថា ធ្វើឲ្យសាធារណជនភាន់ច្រឡំពីការខិតខំប្រឹងប្រែងរបស់រដ្ឋាភិបាល។
លោកថា៖ «ត្រឹមប៉ុណ្ណឹងមិនស្កប់ទេ ផែនការណ៍ដណ្តើមយកព្រឹទ្ធសភា ដើម្បីក្លាយទៅជាប្រមុខរដ្ឋស្តីទី ក្នុងពេលអវត្តមានព្រះមហាក្រត្សត្រូវបានរលាយផុតទៅហើយដែលស្មើនឹងសំឡេងឆ្នោត៦០%។ អញ្ចឹងបានជាគេមិនសម្រេចផែនការណ៍ហ្នឹងហើយបានអត់សេរីនោះ។ ហើយសុំអាស្អី បន្ទប់ស្ថានការណ៍ហ្នឹងល្មមៗ បានហើយអស់លោក ខ្ញុំក៏ដឹងដែរថា អស់លោករៀបចំស្អីយ៉ាងម៉េចៗនោះ»។
សមាជិកបន្ទប់ស្ថានការណ៍បោះឆ្នោត លោក សំ គន្ធាមី បានច្រានចោលការលើកឡើងរបស់លោក ហ៊ុន សែន ដោយថាអ្វីៗដែលបន្ទប់ស្ថានការណ៍បានវាយតម្លៃនិងចេញផ្សាយលោកថា មានវិជ្ជាជីវៈផ្អែកតាមការសិក្សាស្រាវជា្រវដែលបានពីអ្នកសង្កេតការណ៍។
លោកថា៖ «ខាងបន្ទប់ស្ថានការយើងចេញសេចក្តីថ្លែងការណ៍ថ្ងៃមុនហើយអត់មានចោទប្រកាន់អ្នកណា ឬក៏បោះឆ្នោតមិនយុត្តិធម៌យើងអត់បាននិយាយទេ មានតែយើងថា ការបោះឆ្នោតលើកហ្នឹងប្រព្រឹត្តិទៅដោយរលូតដោយសន្តិវិធី អត់មានថា បោះឆ្នោតលើកហ្នឹងអត់មានយុត្តិធម៌អីទេ។ ប៉ុន្តែសន្លឹកឆ្នោត ដែលបោះពុម្ភលើសប្រមាណជាជិត២០%ហ្នឹង យើងមើលទៅច្រើនបើប្រៀបធៀបទៅនឹងបណ្តាប្រទេសផ្សេងៗ ដែលគេបោះលើសតែ២%យ៉ាងច្រើន៥%»។
ចំណែកមេបក្សប្រឆាំងលោក កឹម សុខា វិញបានប្រាប់អ្នកគាំទ្រនៅខេត្តស្វាយរៀងកាលពីថ្ងៃទី២៥ខែមិថុនាថា លទ្ធផលបោះនៃការបោះឆ្នោតនេះ មិនទទួលបានយុត្តិធម៌មួយរយភាគរយទេ។ ប៉ុន្តែលោកថា លទ្ធផលបោះឆ្នោតដែលប្រកាសដោយ គ.ជ.ប នៅពេលនេះលោកថា ជាមូលដ្ឋានគ្រឹះឈានទៅជំរុញឲ្យបក្ស ប្រឆាំងឈ្នះការបោះឆ្នោតនៅឆ្នាំ២០១៨ខាងមុខ។
យ៉ាងណាក៏ដោយក្នុងពិធីនោះដែរ លោក ហ៊ុន សែន បានរំឭកឲ្យមន្ត្រីរបស់ខ្លួនពង្រឹងអភិបាលកិច្ចល្អ ដោយថាត្រូវចាត់ទុកមន្ត្រីទាំងអស់ជាខ្ញុំបម្រើ របស់ប្រជាពលរដ្ឋ ខណៈលទ្ធលផ្លូវការដែលប្រកាសដោយ គ.ជ.ប កាលពីថ្ងៃទី២៥ខែមិថុនាថា ការបោះឆ្នោតឃុំ សង្កាត់ អាណត្តិទី៤នេះ គណបក្សប្រជាជនបានបាត់តំណែងមេឃុំសង្កាត់ អស់ជិត៥០០ និងអាសនៈក្រុមប្រឹក្សាឃុំ សង្កាត់ជាង៤ ០០០ទៀត ដែលចំនួនដែលបាត់បង់នេះ បានទៅលើបក្សប្រឆាំង៕