ក្រុមមន្ត្រីការពារជាតិអាមេរិក បាននិយាយកាលពីយប់មិញថា មន្ទីរបង់តាកោណ ទទួលបានសញ្ញាមកថា កូរ៉េខាងជើងកំពុងរៀបចំសាកល្បងគ្រាប់មីស៊ីលជាថ្មីទៀត ខណៈដែលអាមេរិកកំពុងព្យាយាមជំរុញទៅចិន ឲ្យអនុវត្តទណ្ឌកម្មថ្មីរបស់អង្គការសហប្រជាជាតិ។ នេះដោយយោងតាមការចុះផ្សាយរបស់ទីភ្នាក់ងារព័ត៌មាន AFP។
ថ្លែងក្នុងលក្ខខណ្ឌមិនបញ្ចេញឈ្មោះ មន្ត្រីអាមេរិករូបនោះ បានប្រាប់ថា ប្រសិនការធ្វើតេស្តសាកល្បងនោះដំណើរការទៅមែន អញ្ចឹងការសាកល្បងនោះ ប្រហែលជាកើតឡើងនៅថ្ងៃទី២៧ ខែកក្កដានេះ ពោលគឺនៅចំខួប ៦៤ឆ្នាំនៃការចុះហត្ថលេខាលើកិច្ចព្រមព្រៀងបទឈប់បាញ់កូរ៉េ។
កាលបរិច្ឆេទនោះ គឺជាថ្ងៃបុណ្យជាតិនៅក្នុងរដ្ឋឯកោតែមានអាវុធនុយក្លេអ៊ែរមួយនេះ ដែលចាត់ទុកជាថ្ងៃជ័យជម្នះ។
មន្ត្រីអាមេរិកនិយាយថា ការសាកល្បងអាចជាគ្រាប់មីស៊ីលរយៈចម្ងាយមធ្យម ឬក៏គ្រាប់មីស៊ីលអន្តរទ្វីប ដែលស្គាល់ថា KN-20 ឬក៏គ្រាប់មីស៊ីល ហ្វាសុង-១៤។
ប្រសិនបើការសាកល្បងនេះដំណើរការទៅមុខ អញ្ចឹងនេះជាលើកទីពីរហើយដែលក្រុងព្យុងយ៉ាងសាកល្បងគ្រាប់មីស៊ីលអន្តរទ្វីប បន្ទាប់ពីការបាញ់សាកល្បងលើកទី១ កាលពីថ្ងៃទី០៤ ខែកក្កដា ដែលបង្កឲ្យពិភពលោកព្រួយបារម្ភ៕