ក្នុងកិច្ចសម្ភាសន៍ជាមួយភ្នាក់ងារ VOD កាលពីល្ងាចថ្ងៃទី២៥ សីហា លោកអ៊ូ ប៊ុណ្ណារ៉ាត ហៅក្រឹមបានអះអាងថា លោកមិនមានអ្វីនិយាយជុំវិញប្រតិកម្មរបស់ភរិយាដែលបានសម្ភាសន៍អោយបណ្ដាញផ្សព្វផ្សាយពាក់ព័ន្ធនឹងរឿងលោកមានស្នេហាស៊ីជម្រៅជាមួយនាងលាភនោះទេ បើទោះជាលោកបានសារភាពនោះការហែកហួរនោះគឺមិនខុសពីការបំផ្លាញកេរ្តិ៍ឈ្មោះរបស់លោកយ៉ាងធ្ងន់ធ្ងរ ដែលមិនខុសពីមិនទុកអោយប្ដី។ លោកបានបញ្ជាក់ថាអ្វីដែលភរិយាទម្លាយចេញ ដោយមានទាំងការប្រកាសដាក់បណ្ដឹងនាងលាភពីដណ្ដើមប្ដីនោះផង គឺជារឿងសមស្រប តែលោកបញ្ជាក់ថាភរិយារបស់លោកគួរតែបន្ធូរ។
លោកនិយាយថាលោកមិនមែនមិនខឹងនោះទេ តែលោកយល់ថាអារម្មណ៍ខឹងច្រលោត ឬការលើកឡើងរបស់ អ្នកស្រី វង់ ឡុងមុន្នី ជាភរិយាស្របច្បាប់គឺជាអ្វីដែលមនុស្សទូទៅមិនអាចទ្រាំបាន។ លោកថាខ្លួនមិនហ៊ានហាមឃាត់ចំពោះអ្វីដែលបានកើតឡើងនោះទេ ដោយលោកបានទាំងអះអាងថាបើភរិយាដើមរបស់លោកយល់ថាអ្វីដែលបានធ្វើឡើងគឺជារឿងសប្បាយចិត្ត គឺបន្តធ្វើទៀតចុះ សម្រាប់លោកពេញចិត្តទទួលយក។
ឆ្លើយតបនឹងសំណួរថាតើលោកអាចនឹងដាច់ចិត្តសុំលែងភរិយាក្រោយរងការអាម៉ាស់នេះទេ លោកថាមិនមានគម្រោងដល់ថ្នាក់ចង់លែងប្រពន្ធកម្សត់កម្រនោះទេ ថ្វីដ្បិតតែអ្វីដែលភរិយាដើមបាននិយាយគឺជាបំផ្លាញចំពោះលោកមិនខុសពីដើរស្រាតខោ។ លោកថាធម្មតាមនុស្សស្រីគឺពិតជាពិបាកចិត្តនៅពេលស្វាមីទៅមានប្រពន្ធថ្មី ប៉ុន្តែលោកអះអាងថាតាំងពីបានទាក់ទងជាមួយនាងលាភ លោកមិនដែលចោលផ្ទះ និងមិនអើពើចំពោះកូនៗទាំង៤ដែលជាដំណក់ឈាមរបស់អ្នកស្រី វង់ ឡុងមុន្នី នោះទេ គឺមានតែប្រឹងរកលុយទ្វេរដងដើម្បីផ្គត់ផ្គង់គ្រួសារប្រចាំថ្ងៃ។
លោកសារភាពរវាងលោក និងតារាកំប្លែងនាងគង់ ចាន់ស៊ីណា ហៅនាងលាភ ពិតជារួមរស់ជាមួយគ្នារហូតដល់មានកូនភ្លោះក្នុងពោះដែលក្នុងពេលនេះគឺនាងលាភពរពោះប្រមាណជាង៥ខែ តែលោកនៅអះអាងថាមិនបានស្រឡាញ់នាងលាភ ហើយភ្លេចប្រពន្ធដើម និងចោលផ្ទះសម្បែងម្ដងឡើយ។ សូម្បីតែរឿងលុយកាក់ គឺនាងលាភទទួលបានតែកម្រៃត្រូវសម្ដែងប៉ុណ្ណោះ ចំណែកលុយកាក់ធំៗគឺអ្នកស្រី វង់ ឡុងមុន្នី នៅតែទទួលបានដដែល។ លោកបានទាំងចាត់ទុកថា តារាកំប្លែងស្រីលាភ មិនដែលហ៊ានតបតណាមួយជាមួយអ្នកស្រី វង់ ឡុងមុន្នី នោះទេ សូម្បីតែការតោងទាមលុយកាក់ដែលលោករកបាន ក៏នាងទុកអោយតែលោកផ្គត់ផ្គង់ប្រពន្ធកូនដោយមិនហ៊ានប៉ះពាល់នោះដែរ។ លោកបានបន្តថា នាងលាភមិនដែលបញ្ចេះអោយលោកដាក់ពាក្យសុំលែងអ្នកស្រី វង់ ឡុងមុន្នី នោះទេ តែលោកសារភាពពិតជាមានរឿងរ៉ាវខ្លះផ្ទុះឡើងក្នុងផ្ទះ ដែលបញ្ហានោះលោកថាមិនពាក់ព័ន្ធនឹងនាងលាភទេ គឺពាក់ព័ន្ធនឹងការប្រច័ណ្ឌច្រើន និងការរងសម្ពាធពីការងារតែម្ដង។
លោកមិនមានប្រតិកម្មជុំវិញគម្រោងដាក់បណ្ដឹងរបស់ភរិយាដើមលើតារាកំប្លែងនាងលាភដូចគ្នា បើទោះជាការរួមរស់របស់លោក និងនាង ខុសច្បាប់ឯកពន្ធភាពដែលអាចនឹងមានបញ្ហា។ លោកទទូចអោយអ្នកស្រី វង់ ឡុងមុន្នី បន្ធូរដៃកុំដាក់បណ្ដឹង ដើម្បីទុកមុខមើលគ្នា និងដើម្បីអោយលោកបានបន្តមើលថែកូនៗទាំង៤ដោយមិនមានបញ្ហា។ លោកសារភាពថាមិនចង់បោះបង់នូវការទទួលខុសត្រូវចំពោះនាងលាភនោះទេ ដោយសារតែនាងបានពរពោះកូនភ្លោះដែលជាដំណក់ឈាមរបស់លោកប្រមាណជា៥ខែហើយ។
លោកក៏ប្រកាសមិនចង់បាត់បង់អ្នកស្រី វង់ ឡុងមុន្នី ដូចគ្នា ដោយអះអាងថាលោក និងអ្នកស្រី គឺប្ដីប្រពន្ធកម្សត់កម្រ និងមានអនុស្សាវរីយ៍ជាមួយគ្នារាប់ ដោយសូម្បីអំពើហិង្សា ឬការជេរប្រមាថក៏លោកមិនធ្លាប់បានធ្វើ។ លោកនៅតែចាត់ទុកថាខ្លួនលោកគឺជាស្វាមីល្អ និងជាឪពុកល្អ ដោយក្នុងគ្រួសារលោកថាមិនដែលអោយអ្នកស្រី វង់ ឡុងមុន្នី និងកូនៗខ្វល់រឿងលុយកាក់នោះទេ ដោយបានទាំងរៀបការកូនច្បងអោយមានវែកមានឆ្នាំងមុននេះផង។
លោកចង់អោយអ្នកស្រីផ្ដល់ឱកាសអោយលោកបានដើរផ្លូវទាំង២ ដែលមានន័យថាអនុញ្ញាតិអោយលោកមើលខុសត្រូវកូនៗទាំង៤ជាដំណក់ឈាមក្រោយរៀបការៀង និងបានមើលថែកូនភ្លោះក្នុងផ្ទៃរបស់នាងលាភផង ដែលពេលនេះមានវ័យ៥ខែក្នុងពោះ។ លោកនៅតែអះអាងថាអត់ចង់បាត់បង់អ្នកណាម្នាក់ទាំងអស់ក្នុងចំណោមប្រពន្ធស្របច្បាប់ និងមិនស្របច្បាប់ទាំង២ ប៉ុន្តែបើអ្នកស្រី វង់ ឡុងមុន្នី នៅតែដាក់បណ្ដឹងទៅកាន់តុលាការតាមច្បាប់ឯកពន្ធភាព គឺលោកត្រៀមខ្លួនចូលបំភ្លឺតុលាការ ដោយមិនមានគម្រោងគេចវេះឡើយ។
យ៉ាងណាមិញ លោកបានប្រកាសថាមកទល់ម៉ោងនេះ អ្នកស្រី វង់ ឡុងមុន្នី មិនបានដាក់បណ្ដឹងទៅកាន់តុលាការដូចអ្វីដែលបានប្រកាសឡើងនោះទេ ទើបលោកយល់ថាស្ថានភាពនៅអាចដោះស្រាយបាន ជាពិសេសបើសិជាអ្នកស្រីមានការបន្ធូរដៃ។
លោកទទួលស្គាល់អ្វីដែលអ្នកស្រី វង់ ឡុងមុន្នី ទម្លាយចេញគឺជាការបំផ្លាញខ្លួន តែលោកមិនខឹងមិនច្រលោតនោះទេ ហើយក៏គ្មានគំនិតទៅសុំលែងភរិយាយព្រោះតែរឿងប៉ុណ្ណឹងនោះដែរ ដោយលោកបានទាំងលើកឡើងថាអ្វីៗដែលអ្នកស្រីបានធ្វើ គឺដោយសារតែការឈឺចិត្ត និងអារម្មណ៍ប្រច័ណ្ឌខ្លាំងក្រោយពីដឹងថាលោកទៅមានភរិយាថ្មី ហើយថែមទាំងមានកូនជាមួយគ្នា៥ខែក្នុងពោះបែបនេះ។ សូម្បីតែអ្នកស្រី វង់ ឡុងមុន្នី ប្រកាសថានាងលាភបង្ខំអោយលោកសុំលែង ក៏លោកបញ្ជាក់មិនដែលបានឮនោះដែរ។ លោកថាអ្វីៗជាការយល់ច្រលំ ដោយការពិតនោះគឺនាងលាភដ្បិតថាបានរួមរស់ជាមួយលោក តែមិនដែលមានគំនិតណាមួយអោយលោកលែងប្រពន្ធ ដើម្បីបានលោកពេញសិទ្ធិម្នាក់ឯងនោះទេ ដោយនាងមានតែប្រឹងស្ងាត់ស្ងៀម មិនហ៊ានធ្វើដល់ថ្នាក់ហ្នឹងនោះទេ។
លោកថាអ្នកស្រី វង់ ឡុងមុន្នី មិនមែនប្ដឹងនាងលាភជាលើកទី១ទេ គឺច្រើនដងមកហើយ តែមកពីពេលកន្លងមកចេះតែមានដំណោះស្រាយទើបស្ងាត់រហូតមក។ យ៉ាងណាមិញ លោកសារភាពថាកំហឹងរបស់អ្នកស្រី វង់ ឡុងមុន្នី គឺទប់លែងជាប់ហើយ ទើបឈានដល់ការប្រកាសជាសាធារណៈ។ លោកអះអាងថាមិនមានអារម្មណ៍ខ្វល់ខ្វាយណាមួយដូចគ្នាចំពោះបណ្ដឹងដែលបានប្រកាសឡើង ដោយលោកយល់ព្រមតាមចិត្តអ្នកស្រីគ្រប់រឿង សូម្បីតែចង់អោយលោកទៅកាន់តុលាការពាក់ព័ន្ធនឹងរឿងច្បាប់ឯកពន្ធភាព។ លោកនៅតែអះអាងថាមិនចង់បាត់បង់អ្នកណាម្នាក់ ទើបអ្នកណាៗក៏មានការកោតសរសើរចំពោះនាងលាភ ដែលមានសំណាងត្រូវបាននាយក្រឹមការពារ ក្រោយពេលផ្ទុះរឿងជាមួយភរិយាដើម។
នាងលាភ បានអះអាងថាខ្លួននឹងចាំមើលចំណាត់ការរបស់អ្នកស្រី វង់ ឡុងមុន្នី បន្តបន្ទាប់សិន ដោយនាងបញ្ជាក់ថាបើអ្នកស្រីចង់ប្ដឹង ក៏មានតែឡើងបំភ្លឺតាមការកោះហៅរបស់តុលាការ តែបើអ្នកស្រីគ្រាន់តែកំឡាក៏អ្នកនាងសប្បាយចិត្ត។ អ្នកនាងច្រានចោលសំណើរសុំអោយបកស្រាយ ដោយនាងត្រឹមតែលើកឡើងថាសុំមិននិយាយ និងថារង់ចាំអោយរឿងរ៉ាវកើតឡើងឈានដល់ដំណាក់ៗសិនចាំនាងបន្តដោះស្រាយ។ នាងបានទទួលស្គាល់ថាខ្លួនពិតជាមានកូនភ្លោះជាមួយនាយក្រឹម តែត្រង់ការចោទថានាងធ្លាប់មានជម្លោះជាមួយភរិយាដើមនាយក្រឹម និងធ្លាប់បញ្ចេះនាយក្រឹមអោយសុំលែងភរិយាដើម គឺនាងបញ្ជាក់ថាសុំមិនធ្វើការបកស្រាយ។
មកទល់ពេលនេះគេនៅមិនទាន់ដឹងថាអ្នកស្រី វង់ ឡុងមុន្នី នឹងមានជំហរបន្ទន់ឥរិយាបទយោគយល់ ឬបន្តដាក់បណ្ដឹងនោះទេ បន្ទាប់ពីនាយក្រឹមត្រូវបានបណ្ដាញសារព័ត៌មានបង្ហោះថាមិនអាចបោះបង់នាងលាភ ដែលមានន័យថាគឺលោកចង់ជិះទូក២ដូចអ្វីដែលភរិយាដើមប្រកាសដាច់ខាតមិនទទួលយក៕